جدہ اسلامی بندرگاہ پر 58 کلوگرام منشیات اسمگلنگ کی کوشش ناکام

جدہ اسلامی بندرگاہ کے کسٹمز حکام نے 58.6 کلوگرام میتھامفیٹامین (شبو) کی اسمگلنگ کی کوشش ناکام بنا دی، جو مملکت آنے والی ایک درآمدی کھیپ میں چھپائی گئی تھی۔

ہیئة زکوة و ٹیکس و کسٹمز کے ترجمان حمود الحربی نے بتایا کہ بندرگاہ پر مردانہ جوتوں کی ایک کھیپ پہنچی، جسے جب کسٹمز کارروائی اور سکیورٹی ٹیکنالوجی کے ذریعے چیک کیا گیا تو جوتوں کے اندرونی حصے میں مذکورہ مقدار میں نشہ آور گولیاں برآمد ہوئیں۔

الحربی نے مزید بتایا کہ ضبطی کے بعد جنرل ڈائریکٹوریٹ آف نارکوٹکس کنٹرول سے رابطہ کیا گیا، جس کے نتیجے میں مملکت کے اندر سامان وصول کرنے والے تین افراد کو گرفتار کر لیا گیا۔

ترجمان نے اس عزم کا اعادہ کیا کہ اتھارٹی تمام کسٹمز پوائنٹس پر درآمدات و برآمدات کی سخت نگرانی جاری رکھے ہوئے ہے اور اسمگلنگ کی کوششوں کو ناکام بنانے کے لیے پرعزم ہے، تاکہ معاشرے کے تحفظ اور سلامتی کو یقینی بنایا جا سکے۔ اس مقصد کے لیے وزارت داخلہ اور نارکوٹکس کنٹرول ڈائریکٹوریٹ کے ساتھ قریبی تعاون جاری ہے۔

الحربی نے عوام سے اپیل کی کہ وہ معاشرے اور قومی معیشت کے تحفظ کے لیے اسمگلنگ کے خلاف کوششوں میں حصہ لیں اور کسی بھی مشتبہ سرگرمی کی اطلاع کسٹمز اتھارٹی کے سکیورٹی ہیلپ لائن (1910)، ای میل ([email protected]) یا بین الاقوامی نمبر (009661910) پر دیں۔ اتھارٹی ان ذرائع سے موصول ہونے والی معلومات کو مکمل رازداری کے ساتھ نمٹاتی ہے اور درست اطلاع دینے والے کو مالی انعام بھی دیا جاتا ہے۔