عسیر میں پانچ ایتھوپیائی منشیات اسمگلروں کو سزائے موت

وزارت داخلہ نے آج جمعرات کو عسیر ریجن میں پانچ منشیات اسمگلروں کو تعزیری طور پر سزائے موت دے دی۔

وزارت نے بتایا کہ سقاو عساے براتو تسفای، کنفہ تخلاے ہدوش فوادو، مکلیہ مرہن قرزقیر قبرا، دستا قبرہ کیروس امبایا اور محاری قبرہ ہواریہ ہیلا ہیلاسا (تمام ایتھوپیائی باشندے) کو مملکت میں منشیات (حشیش) اسمگل کرنے کے جرم میں سزا سنائی گئی۔

وزارت کے مطابق، سکیورٹی اداروں نے ملزمان کو گرفتار کیا، تفتیش کے بعد ان پر فرد جرم عائد ہوئی اور انہیں متعلقہ عدالت میں پیش کیا گیا، جہاں جرم ثابت ہونے پر سزائے موت کا حتمی فیصلہ سنایا گیا۔ اس فیصلے کی اپیل اور سپریم کورٹ سے توثیق کے بعد شاہی فرمان کے تحت سزا پر عمل درآمد کیا گیا۔

وزارت داخلہ نے اس بات پر زور دیا کہ سعودی حکومت شہریوں اور مقیم افراد کو منشیات کے ناسور سے بچانے کے لیے پرعزم ہے اور اسمگلروں و فروخت کنندگان کے خلاف سخت ترین سزائیں نافذ کی جائیں گی۔ وزارت نے خبردار کیا کہ اس جرم کے مرتکب افراد کو شرعی سزا کا سامنا کرنا پڑے گا۔