جازان میں بجلی کے شارٹ سرکٹ سے ماں اور چار بچے جاں بحق

جازان کے ضلع صامطہ کی ایک بستی، اللقیہ میں گزشتہ شب بجلی کے شارٹ سرکٹ کے باعث گھر میں آگ لگ گئی، جس کے نتیجے میں ماں اور اس کے چار بچے جاں بحق ہو گئے جبکہ والد شدید زخمی ہو گئے۔

اطلاعات کے مطابق، آگ گھر کے اندر لگی جس پر قریبی رہائشیوں نے اہل خانہ کو بچانے اور متعلقہ اداروں کو اطلاع دینے کی کوشش کی، تاہم آگ نے ماں اور بچوں کی جان لے لی۔

جازان ہیلتھ کلسٹر کے ترجمان جبریل القبی نے بتایا کہ صامطہ جنرل اسپتال کو منگل 21 جولائی 2026 کی شام اس واقعے کی اطلاع ملی، جس کے بعد طبی اور امدادی ٹیموں نے فوری طور پر متاثرین کو علاج فراہم کیا۔

انہوں نے بتایا کہ اسپتال میں چھ افراد کو لایا گیا، جن میں ایک زخمی (والد) کو دل کی دھڑکن بند ہونے کے بعد سی پی آر دیا گیا اور پھر مزید علاج کے لیے اسے جازان کے کنگ فہد سینٹرل اسپتال منتقل کیا گیا، جہاں وہ انتہائی نگہداشت میں تشویشناک حالت میں زیر علاج ہیں۔

انہوں نے مزید بتایا کہ حادثے میں دم گھٹنے سے پانچ افراد جاں بحق ہوئے، جن میں 37 سالہ خاتون، 11 سالہ بچی، 10 سالہ بچہ، 6 سالہ بچہ اور ایک سالہ بچی شامل ہیں۔

ترجمان نے بتایا کہ جاں بحق افراد کے حوالے سے تمام قانونی کارروائیاں متعلقہ اداروں کے تعاون سے مکمل کر لی گئی ہیں۔ انہوں نے متاثرہ خاندان سے تعزیت اور زخمی کی جلد صحت یابی کی دعا بھی کی۔