بہا ق متعدی نہیں، بروقت تشخیص سے اس پر قابو ممکن ہے

ماہرہ کموفلاج امیرہ العتیبی نے واضح کیا ہے کہ بہا ق ایک خودکار مدافعتی مرض ہے جو جلد کی رنگت ختم ہونے اور جسم کے مختلف حصوں پر سفید دھبے بننے کا باعث بنتا ہے۔ ان کے مطابق اس مرض کی کوئی ایک مخصوص وجہ نہیں بلکہ یہ کئی مدافعتی، جینیاتی اور ماحولیاتی عوامل کے باہمی اثر سے ہو سکتا ہے۔

ان کا کہنا تھا کہ بہا ق ہرگز متعدی نہیں اور نہ ہی یہ چھونے یا میل جول سے منتقل ہوتا ہے۔ بعض افراد میں اس کے لیے جینیاتی رجحان ہو سکتا ہے، تاہم خاندان میں کسی ایک فرد کو بہا ق ہونے کا مطلب یہ نہیں کہ باقی افراد بھی ضرور متاثر ہوں گے۔

انہوں نے بتایا کہ عام طور پر بہا ق کی ابتدا جسم کے مختلف حصوں پر ہلکے یا سفید دھبوں سے ہوتی ہے، جو بعض کیسز میں محدود رہتے ہیں جبکہ بعض میں بتدریج پھیل سکتے ہیں۔ اس کے پھیلاؤ اور رفتار میں ہر فرد میں فرق ہو سکتا ہے۔

انہوں نے مزید کہا کہ بعض افراد میں بہا ق کی سرگرمی جلدی چوٹ، سورج کی تیز روشنی یا ذہنی دباؤ جیسے عوامل سے جڑی ہو سکتی ہے، جبکہ بعض اوقات بغیر کسی واضح وجہ کے بھی یہ فعال ہو جاتا ہے۔ اس لیے بروقت تشخیص اور ماہر جلد سے مسلسل رابطہ رکھنا ضروری ہے تاکہ ہر مریض کے لیے موزوں علاج تجویز کیا جا سکے۔

ان کا کہنا تھا کہ اکثر مریضوں میں بہا ق کی سرگرمی پر قابو پایا جا سکتا ہے، تاہم ایسا کوئی علاج موجود نہیں جو ہر صورت اس کے پھیلاؤ کو مکمل طور پر روک دے۔ علاج کے انتخاب میں مریض کی عمر، دھبوں کی جگہ، جلد کا متاثرہ رقبہ اور مرض کی شدت کو مدنظر رکھا جاتا ہے۔

انہوں نے بتایا کہ علاج کے کئی طریقے ہیں جن کا تعین ماہر جلد ہر مریض کے لیے الگ سے کرتا ہے، جن میں بعض مقامی ادویات، فوٹو تھراپی اور جدید علاج جیسے JAK انہیبیٹرز شامل ہیں، جبکہ مخصوص کیسز میں سرجری بھی کی جا سکتی ہے۔

انہوں نے مزید کہا کہ 'کموفلاج' ایک جمالیاتی طریقہ ہے جو جلد کے رنگ کو یکساں بنانے اور متاثرہ و غیر متاثرہ حصوں کے فرق کو چھپانے میں مدد دیتا ہے، جس سے ظاہری خوبصورتی اور خود اعتمادی میں بہتری آ سکتی ہے۔ تاہم یہ طبی علاج کا متبادل نہیں اور ماہر سے مشورہ ضروری ہے۔

انہوں نے بہا ق کے مریضوں کو مشورہ دیا کہ وہ علاج کی ہدایات پر عمل کریں، باقاعدہ طبی معائنہ کرائیں، جلد کو سورج کی شعاعوں سے بچائیں، جلدی چوٹوں سے حتی الامکان گریز کریں اور غیر مصدقہ نسخے یا علاج استعمال نہ کریں۔ ساتھ ہی نفسیاتی صحت اور خود اعتمادی کا بھی خیال رکھیں۔

العتیبی نے کہا کہ بہا ق سے متعلق عام غلط فہمیوں میں یہ خیال شامل ہے کہ یہ متعدی ہے، صفائی سے جڑا ہے یا اس کی وجہ خوف یا غم ہے، جبکہ حقیقت میں یہ ایک مدافعتی مرض ہے اور میل جول سے نہیں پھیلتا۔

انہوں نے زور دیا کہ بہا ق کسی انسان کی قدر یا خوبصورتی کا پیمانہ نہیں اور اس سے درست انداز میں نمٹنے کے لیے آگاہی، بروقت تشخیص اور طبی رہنمائی ضروری ہے۔ انہوں نے معاشرے پر زور دیا کہ وہ غلط تصورات سے گریز کرے اور مریضوں کی نفسیاتی و سماجی طور پر حوصلہ افزائی کرے۔