سوموار کو شدید گرمی اور گرد آلود ہوائیں، بارش کا امکان

قومی مرکز برائے موسمیات نے اپنی روزانہ موسمی رپورٹ میں کہا ہے کہ مملکت کے مشرقی علاقے اور ریاض، مدینہ منورہ اور مکہ مکرمہ کے بعض حصوں میں شدید گرمی کی لہر برقرار رہے گی۔

رپورٹ کے مطابق ان علاقوں کے علاوہ شمالی سرحدی علاقہ، الجوف اور تبوک کے کچھ حصوں میں بھی تیز ہوائیں چلیں گی جو گرد و غبار کا باعث بنیں گی، اور ساحلی شاہراہ پر جازان کی سمت حد نگاہ تقریباً ختم ہو سکتی ہے۔

اسی طرح مغربی اور جنوب مغربی علاقوں میں بھی گرد آلود فضا برقرار رہے گی، جبکہ ان علاقوں خصوصاً جنوبی حصوں اور نجران کے بعض مقامات پر گرج چمک کے ساتھ بارش کا امکان بھی موجود ہے۔

ہواؤں کی سمت اور سمندر کی کیفیت

رپورٹ میں بتایا گیا ہے کہ بحیرہ احمر میں سطحی ہوائیں شمال مغرب سے مغرب کی سمت 12 سے 34 کلومیٹر فی گھنٹہ کی رفتار سے چلیں گی، جبکہ درمیانی اور جنوبی حصوں میں یہ رفتار 45 کلومیٹر فی گھنٹہ تک پہنچ سکتی ہے، اور جنوبی حصے میں گرج چمک کے ساتھ بارش کے دوران 50 کلومیٹر فی گھنٹہ تک ہو سکتی ہے۔

بحیرہ احمر میں موجوں کی اونچائی شمالی حصے میں نصف میٹر سے ڈیڑھ میٹر تک، جبکہ درمیانی اور جنوبی حصوں میں ایک سے دو میٹر تک رہے گی، اور جنوبی حصے میں گرج چمک کے ساتھ بارش کے دوران دو میٹر سے زیادہ ہو سکتی ہے۔ سمندر کی کیفیت عمومی طور پر ہلکی سے درمیانی موجوں والی رہے گی، تاہم گرج چمک کے ساتھ موجیں تیز ہو جائیں گی۔

خلیج عرب میں ہوائیں شمال مغرب سے جنوب مغرب کی سمت چلیں گی جو شام کے وقت جنوب مشرق کی طرف مڑ جائیں گی، شمالی اور درمیانی حصوں میں رفتار 15 سے 30 کلومیٹر فی گھنٹہ اور جنوبی حصے میں جنوب مشرق سے شمال مشرق کی سمت 10 سے 28 کلومیٹر فی گھنٹہ رہے گی۔ موجوں کی اونچائی نصف میٹر سے ایک میٹر تک اور سمندر کی کیفیت ہلکی موجوں والی رہے گی۔