ولی عہد نے سیئر کی پہلی گاڑی متعارف کرادی

سعودی ولی عہد و وزیراعظم شہزادہ محمد بن سلمان بن عبدالعزیز نے آج پبلک انویسٹمنٹ فنڈ کے چیئرمین کی حیثیت سے قومی آٹو کمپنی سیئر کی پہلی گاڑی 'اکزوبوٹ' متعارف کرائی۔ یہ اقدام سعودی عرب کے جدید صنعتی شعبے کی ترقی اور وژن 2030 کے اہداف کے حصول کی سمت میں اہم پیش رفت ہے، جس سے عالمی سطح پر سعودی عرب کی پوزیشن مضبوط ہوگی۔

اس موقع پر ولی عہد نے کہا: "سیئر کی پہلی گاڑی کی لانچنگ مملکت کے صنعتی نظام کو مستحکم اور خوشحال بنانے کی جانب ایک اور قدم ہے۔ اس سے آٹو انڈسٹری کو اقتصادی نمو کا اہم ذریعہ بنانے، سرمایہ کاری کے فروغ، قومی صلاحیتوں کے فروغ اور نجی شعبے کے کردار کو مضبوط کرنے میں مدد ملے گی، تاکہ سعودی عرب اس شعبے میں علاقائی اور عالمی سطح پر نمایاں مرکز بن سکے۔"

'اکزوبوٹ' سیڈان اور فور وہیل ڈرائیو ماڈلز کے ساتھ سیئر کی پہلی پروڈکٹ ہے، جو آئندہ پانچ برسوں میں سات ماڈلز پر مشتمل فلیٹ کا حصہ ہوگی۔ ان میں درمیانے اور چھوٹے سائز کی گاڑیاں اور مختلف ڈرائیو سسٹمز شامل ہوں گے، جو صارفین کی مختلف ضروریات کو پورا کریں گی۔ تمام ماڈلز کا پیداواری عمل کنگ سلمان آٹو موٹیو سٹی کے تحت واقع سیئر انڈسٹریل کمپلیکس میں ہوگا، جو مشرق وسطیٰ کا سب سے بڑا اور دنیا کے جدید ترین آٹو پلانٹس میں سے ایک ہے۔

'اکزوبوٹ' کا منفرد ڈیزائن سعودی سرزمین سے متاثر اور اس کی ثقافت سے جڑا ہوا ہے، جو مملکت کے وژن کی عکاسی کرتا ہے۔ ان گاڑیوں کی ڈیزائننگ اور انجینئرنگ مقامی سطح پر عالمی معیار کے مطابق کی گئی ہے، جس سے سعودی عرب کی ابھرتی ہوئی آٹو انڈسٹری کو تقویت ملے گی۔

توقع ہے کہ سیئر کمپنی 2034 تک سعودی عرب کی مجموعی قومی پیداوار میں 30 ارب سعودی ریال (8 ارب ڈالر) سے زائد کا حصہ ڈالے گی، تجارتی توازن کو تقریباً 80 ارب سعودی ریال (21 ارب ڈالر) بہتر بنائے گی اور براہ راست و بالواسطہ معیاری روزگار کے مواقع پیدا کرے گی۔

سیئر کی پہلی گاڑی کی رونمائی پبلک انویسٹمنٹ فنڈ کی اس کوشش کا حصہ ہے جس کا مقصد سعودی عرب میں عالمی معیار کی آٹو انڈسٹری قائم کرنا ہے۔ فنڈ نے 2022 میں سیئر کمپنی قائم کی تھی، جو سعودی عرب کی پہلی مقامی آٹو برانڈ ہے۔ اس کا مقصد صنعتی شعبے کی ترقی، سرمایہ کاری کے فروغ، نجی شعبے کے مواقع اور قومی پیداوار میں اضافہ ہے۔