پاکستانی فوج: سعودی خودمختاری اور سلامتی پر کوئی سمجھوتہ نہیں

پاکستانی فوج کے ترجمان لیفٹیننٹ جنرل احمد شریف چودھری نے کہا ہے کہ سعودی عرب پر حملوں کا سامنا 'حلف مکہ' کے رکن ممالک کی جانب سے مشترکہ ردعمل کے ساتھ کیا جائے گا۔ انہوں نے واضح کیا کہ پاکستان تمام دستیاب وسائل بروئے کار لانے کے لیے تیار ہے۔

انہوں نے 'انڈپینڈنٹ عربیہ' سے گفتگو میں کہا کہ 'سعودی عرب کی خودمختاری، اس کی سرزمین کی سلامتی اور حرمین شریفین کا تحفظ ایسے امور ہیں جن پر کوئی سمجھوتہ یا سودے بازی نہیں ہو سکتی'۔

انہوں نے مزید کہا: 'جب ہم یہ بات کرتے ہیں تو اس کا مطلب ہے کہ ان مقاصد کے حصول کے لیے ہر ضروری تعاون پہلے ہی فراہم کیا جا رہا ہے اور آئندہ بھی جاری رہے گا'۔ انہوں نے کہا کہ آپریشنل راز داری کے تقاضے کے باعث اس کی تفصیلات بیان نہیں کی جا سکتیں۔

بین الاقوامی طور پر تسلیم شدہ یمنی حکومت کو براہ راست فوجی مدد فراہم کرنے کے امکان کے بارے میں سوال پر احمد شریف چودھری نے کہا کہ انہیں علم نہیں کہ اسلام آباد کو اس حوالے سے کوئی باضابطہ درخواست موصول ہوئی ہے یا نہیں، تاہم انہوں نے واضح کیا کہ اگر کوئی درخواست پیش کی گئی تو پاکستان اس کا جائزہ لے کر مناسب فیصلہ کرے گا۔