سعودی عرب میں آج گرج چمک کے ساتھ بارش اور گرد آلود ہوائیں متوقع

قومی مرکز برائے موسمیات نے آج کے موسم کی رپورٹ میں پیش گوئی کی ہے کہ جازان، عسیر، الباحہ اور مکہ مکرمہ کے کچھ حصوں میں درمیانے سے شدید درجے کی گرج چمک کے ساتھ بارشیں ہوں گی، جن سے سیلابی صورتحال پیدا ہو سکتی ہے۔ ان بارشوں کے ساتھ ژالہ باری اور تیز ہوائیں بھی چلیں گی جو گرد و غبار کا باعث بنیں گی۔ مدینہ منورہ، حائل، قصیم، ریاض اور مشرقی ریجن کے کچھ علاقوں میں ہلکی سے درمیانی بارش متوقع ہے۔ اسی طرح تبوک، الجوف اور شمالی سرحدی علاقوں میں بھی کہیں کہیں دھند چھا سکتی ہے۔

رپورٹ کے مطابق بحیرہ احمر کے شمالی اور وسطی حصے میں سطحی ہوائیں شمال مغرب سے شمال کی سمت 20 سے 42 کلومیٹر فی گھنٹہ کی رفتار سے چلیں گی، جبکہ جنوبی حصے میں جنوب مشرق سے جنوب مغرب کی سمت 12 سے 35 کلومیٹر فی گھنٹہ کی رفتار سے ہوں گی جو بعض اوقات 50 کلومیٹر فی گھنٹہ سے بھی تجاوز کر سکتی ہیں۔ سمندر کی لہریں آدھے میٹر سے ڈیڑھ میٹر تک بلند ہوں گی اور بحیرہ احمر کی حالت ہلکی سے درمیانی اور بعض اوقات شدید لہروں والی رہے گی۔

خلیج عرب میں ہوائیں شمال مغرب سے شمال کی سمت 20 سے 45 کلومیٹر فی گھنٹہ کی رفتار سے چلیں گی، جبکہ جنوبی حصے میں شمال مغرب سے مغرب کی سمت 18 سے 45 کلومیٹر فی گھنٹہ کی رفتار سے ہوں گی۔ یہاں سمندر کی لہریں ایک میٹر سے دو میٹر تک بلند ہوں گی اور خلیج عرب کی حالت درمیانی سے شدید لہروں والی رہے گی۔