جازان میں خطرہ ٹل گیا، شہری دفاع کی حفاظتی ہدایات جاری

سعودی شہری دفاع کی جنرل ڈائریکٹوریٹ نے جازان ریجن سے خطرے کے خاتمے کا اعلان کیا ہے۔

اس سے قبل شہری دفاع نے جازان میں ہنگامی حالات کے لیے قومی ابتدائی انتباہی پلیٹ فارم سے خطرے کی وارننگ جاری کی تھی۔

اعرض التغريدة على منصة X

شہری دفاع کی جنرل ڈائریکٹوریٹ نے خطرے کے قریب سائرن سنائی دینے کی صورت میں عمل کرنے کے لیے متعدد ہدایات بھی جاری کی ہیں۔

ادارے نے واضح کیا کہ سائرن سنائی دینے پر سب سے پہلے پرسکون رہیں اور سرکاری ہدایات پر عمل کریں، پھر فوراً قریبی محفوظ جگہ یا عمارت کے اندرونی کمرے میں جائیں اور کھڑکیوں سے دور رہیں، اور خطرہ ختم ہونے تک وہیں رہیں۔

شہری دفاع نے درج ذیل اقدامات کی ہدایت کی ہے:

کھلی جگہوں، شیشے کے قریب اور بالکونی یا چھت پر کھڑے ہونے سے گریز کریں۔

اگر آپ باہر ہیں تو قریبی عمارت میں داخل ہو جائیں یا کسی مضبوط دیوار کے پیچھے پناہ لیں۔

خطرہ ختم ہونے کا سائرن سننے تک باہر نہ نکلیں۔

اگر کسی خطرے کا مشاہدہ کریں تو مکہ مکرمہ، مدینہ منورہ، ریاض اور مشرقی ریجن میں ہنگامی نمبر (911) اور مملکت کے دیگر علاقوں میں (998) پر رابطہ کریں۔

متعلقہ اداروں کی جانب سے جاری کردہ ہدایات صرف سرکاری ذرائع سے حاصل کریں۔