دمام ایئرپورٹ پر 18 ہزار سے زائد ایمفیٹامین گولیاں اسمگل کرنے کی کوشش ناکام

دمام کے کنگ فہد انٹرنیشنل ایئرپورٹ کے کسٹمز حکام نے 18,549 نشہ آور ایمفیٹامین گولیاں اسمگل کرنے کی کوشش ناکام بنا دی، جو ایک پارسل میں چھپائی گئی تھیں۔

ہیئة زکوة و ٹیکس و کسٹمز کے ترجمان حمود الحربی نے بتایا کہ ایئرپورٹ کے ذریعے مملکت میں ایک ڈاک پارسل آیا، جسے جب کسٹمز کارروائی اور سکیورٹی ٹیکنالوجی کے ذریعے چیک کیا گیا تو اس میں مذکورہ مقدار میں نشہ آور گولیاں برآمد ہوئیں۔

الحربی نے مزید بتایا کہ ضبطی کے بعد جنرل ڈائریکٹوریٹ آف نارکوٹکس کنٹرول سے رابطہ کیا گیا، جس کے نتیجے میں مملکت کے اندر مذکورہ پارسل وصول کرنے والے چار افراد کو گرفتار کر لیا گیا۔

ترجمان نے اس عزم کا اعادہ کیا کہ اتھارٹی تمام کسٹمز پوائنٹس پر مملکت کی درآمدات و برآمدات پر سخت نگرانی جاری رکھے ہوئے ہے اور اسمگلنگ کی کوششوں کو روکنے کے لیے وزارت داخلہ اور جنرل ڈائریکٹوریٹ آف نارکوٹکس کنٹرول سمیت اپنے شراکت داروں کے ساتھ مل کر معاشرے کے تحفظ اور سلامتی کو یقینی بنانے کے لیے کوشاں ہے۔

الحربی نے عوام سے اپیل کی کہ وہ اسمگلنگ کی روک تھام اور معاشرے و قومی معیشت کے تحفظ کے لیے اتھارٹی کے سکیورٹی ہیلپ لائن (1910)، ای میل ([email protected]) یا بین الاقوامی نمبر (009661910) پر اطلاع دیں۔ اتھارٹی ان ذرائع سے موصول ہونے والی اطلاعات کو مکمل رازداری کے ساتھ نمٹاتی ہے اور درست اطلاع دینے والے کو مالی انعام بھی دیا جاتا ہے۔