سعودی عرب میں یمنی باشندوں کے اقامتی مسائل کی درستگی کیلئے دو ماہ کی مہم

سعودی محکمہ جوازات نے متعلقہ اداروں کے تعاون سے مملکت میں غیر قانونی طور پر مقیم تمام یمنی باشندوں کے اقامتی مسائل درست کرنے کے اقدامات کا آغاز کر دیا ہے۔ یہ مہم اتوار 30 ربیع الآخر 1448ھ بمطابق 11 اکتوبر 2026 سے ملک بھر میں دو ماہ تک جاری رہے گی۔

یہ اقدام خادم الحرمین الشریفین شاہ سلمان بن عبدالعزیز آل سعود کی ہدایت پر، یمنی صدارتی قیادت کونسل کے سربراہ ڈاکٹر رشاد محمد العلیمی کی درخواست پر، یمنی باشندوں کے اقامتی مسائل حل کرنے کے لیے شروع کیا گیا ہے۔

مستفید ہونے والے افراد اور اصلاحی اقدامات

• یمنی باشندے جن کے پاس کوئی دستاویز یا پاسپورٹ نہیں: انہیں چھ ماہ کے لیے مفت وزٹ ویزا جاری کیا جائے گا، بشرطیکہ وہ ابشر پلیٹ فارم پر آن لائن وقت لے کر اپنی یمنی شہریت کا ثبوت پیش کریں۔
• زائر کارڈ یا ختم شدہ وزٹ ویزا رکھنے والے: ان کے ویزے چھ ماہ کے لیے آن لائن توسیع کیے جائیں گے، بشرطیکہ ان کے پاس کارآمد پاسپورٹ ہو، اور انہیں جوازات دفاتر جانے کی ضرورت نہیں ہوگی۔
• ایسے مقیمین جن کے اقامے ختم ہو چکے ہیں: وہ ڈیجیٹل پلیٹ فارمز (ابشر، قوی، مساند) کے ذریعے ضرورت مند آجر کے پاس منتقل ہو سکتے ہیں یا بغیر کسی پابندی کے خروج نہائی ویزا پر ملک چھوڑ سکتے ہیں۔
• ایسے افراد جن پر فرار کا مقدمہ درج ہے: ان کے خلاف درج غیبت کی اطلاع منسوخ کر کے ان کی خدمات نئے آجر کے پاس قوی اور مساند پلیٹ فارمز کے ذریعے منتقل کی جا سکتی ہیں، بشرطیکہ ان کے سفری دستاویزات کارآمد ہوں۔

مملکت کے مختلف علاقوں میں اصلاحی مراکز

محکمہ جوازات نے سرحدی قوانین کی خلاف ورزی کرنے والے افراد کی اصلاح کے لیے مختلف علاقوں میں مراکز مختص کیے ہیں، جن میں ریاض میں چار مراکز، جبکہ نجران، مدینہ منورہ، الباحہ، شمالی سرحد، تبوک، قصیم اور حائل میں ایک ایک مرکز شامل ہے۔ اس کے علاوہ مکہ مکرمہ اور جازان میں دو، عسیر اور مشرقی ریجن میں تین تین اور الجوف میں دو مراکز قائم کیے گئے ہیں۔

محکمہ جوازات نے واضح کیا ہے کہ یہ اقدامات یمنی باشندوں کے اقامتی مسائل کی اصلاح کو آسان بنانے اور ڈیجیٹل پلیٹ فارمز کے ذریعے تیز اور سہل بنانے کے لیے کیے گئے ہیں۔