عسیر میں بغیر اجازت کیمپنگ پر شہری گرفتار

ماحولیاتی سکیورٹی کی خصوصی فورس نے ایک شہری کو ماحولیاتی قوانین کی خلاف ورزی پر اس وقت گرفتار کیا جب اس نے عسیر ریجن میں بغیر اجازت کیمپنگ کی۔ اس کے خلاف ضابطے کے مطابق کارروائی عمل میں لائی گئی۔

فورس کے مطابق، جنگلات یا قومی پارکوں میں بغیر اجازت کیمپنگ کرنے پر تین ہزار سعودی ریال تک جرمانہ عائد کیا جا سکتا ہے۔

ماحولیاتی سکیورٹی فورس نے عوام سے اپیل کی ہے کہ اگر وہ ماحول یا جنگلی حیات کے خلاف کسی بھی قسم کی خلاف ورزی دیکھیں تو مکہ مکرمہ، مدینہ منورہ، ریاض اور مشرقی ریجن میں 911 جبکہ دیگر علاقوں میں 999 یا 996 پر اطلاع دیں۔

فورس نے اس بات کی یقین دہانی کرائی ہے کہ تمام شکایات کو مکمل رازداری کے ساتھ نمٹایا جائے گا اور اطلاع دینے والے پر کوئی ذمہ داری عائد نہیں ہوگی۔