جازان اور نجران میں ابتدائی انتباہ جاری، شہریوں کو احتیاط کی ہدایت

سعودی عرب میں محکمہ شہری دفاع نے جازان اور نجران کے شہریوں سے اپیل کی ہے کہ وہ ہنگامی حالات کے لیے قومی ابتدائی انتباہی پلیٹ فارم سے جاری انتباہ کے بعد حفاظتی اقدامات پر عمل کریں۔

محکمہ شہری دفاع نے زور دیا کہ شہری پرسکون رہیں، سرکاری ہدایات پر عمل کریں، عمارتوں کے اندر رہیں اور کسی محفوظ داخلی کمرے یا ایسی جگہ جائیں جو کھڑکیوں سے دور ہو۔ خطرہ ختم ہونے تک گھر یا عمارت نہ چھوڑیں۔

ہدایت میں کہا گیا ہے کہ کھلی جگہوں اور شیشے کے قریب جانے سے گریز کریں، بالکونی یا چھت پر ہرگز نہ جائیں۔ جو لوگ عمارت سے باہر ہیں، وہ قریبی عمارت میں داخل ہو جائیں یا کسی مضبوط دیوار کے پیچھے پناہ لیں۔

محکمہ نے مزید کہا کہ ہجوم سے بچیں اور کسی بھی صورت میں تصاویر نہ بنائیں، خطرناک مقامات سے دور رہیں۔ اگر انتباہی پیغام ڈرائیونگ کے دوران ملے تو سڑک کے کنارے، پلوں اور بلند عمارتوں سے دور رک جائیں۔

محکمہ نے ہدایت کی کہ کسی بھی خطرے کی صورت میں مکہ مکرمہ، مدینہ منورہ، ریاض اور مشرقی ریجن میں ہنگامی نمبر (911) اور باقی علاقوں میں (998) پر فوری رابطہ کریں۔

مزید کہا گیا کہ متعلقہ اداروں کی جانب سے جاری کردہ ہدایات کو سرکاری ذرائع سے باقاعدگی سے سنیں اور ان پر عمل کریں۔