ابہا اور خمیس مشیط میں خطرہ ٹل گیا، شہری دفاع کا اعلان

سعودی شہری دفاع نے اعلان کیا ہے کہ ابہا شہر اور خمیس مشیط میں خطرہ ٹل گیا ہے۔ یہ اعلان ہنگامی حالات میں قومی ابتدائی انتباہی پلیٹ فارم کے ذریعے الرٹ جاری کرنے کے بعد کیا گیا۔ شہری دفاع نے عوام سے اپیل کی ہے کہ وہ متعلقہ اداروں کی جانب سے جاری کردہ ہدایات اور رہنمائی پر عمل جاری رکھیں۔

شہری دفاع نے اپنے سرکاری ایکس اکاؤنٹ پر جاری دو تنبیہوں میں زور دیا ہے کہ لوگ ہر صورت ہجوم سے گریز کریں اور کسی بھی قسم کی ویڈیو یا تصاویر نہ بنائیں، تاکہ عوامی سلامتی برقرار رہے۔ مزید کہا گیا ہے کہ کسی بھی ہنگامی صورت میں ہنگامی نمبر 998 پر رابطہ کریں۔

یاد رہے کہ الرٹ جاری ہونے کے بعد شہری دفاع نے رہائشیوں کو ہدایت کی تھی کہ وہ پرسکون رہیں، سرکاری ہدایات پر عمل کریں، قریبی محفوظ مقام پر چلے جائیں، کھڑکیوں، کھلی جگہوں، چھتوں اور بالکونیوں سے دور رہیں اور خطرہ ختم ہونے تک باہر نہ نکلیں۔

اسی طرح باہر موجود افراد کو مشورہ دیا گیا تھا کہ وہ فوراً قریبی عمارت میں داخل ہو جائیں یا کسی مضبوط دیوار کے پیچھے پناہ لیں۔ گاڑی چلانے والوں کو ہدایت کی گئی کہ وہ الرٹ موصول ہونے پر پلوں اور بلند عمارتوں سے دور کسی محفوظ جگہ پر رک جائیں اور سرکاری ذرائع سے جاری ہدایات پر عمل کرتے رہیں۔