سعودی کسٹمز نے ایک ہفتے میں 1263 ممنوعہ اشیاء ضبط کیں

سعودی عرب کے بری، بحری اور فضائی کسٹمز نے ایک ہفتے کے دوران 1263 ممنوعہ اشیاء ضبط کیں۔ یہ کارروائیاں زکوة، ٹیکس اور کسٹمز اتھارٹی (زاتکا) کی جانب سے سکیورٹی کو مضبوط بنانے اور معاشرے کو مختلف اقسام کی ممنوعہ اشیاء سے محفوظ رکھنے کی مسلسل کوششوں کا حصہ ہیں۔

ضبط کی گئی اشیاء میں 62 اقسام کی منشیات شامل ہیں، جن میں حشیش، کوکین، ہیروئن، شبو، کیپٹاگون گولیاں اور دیگر شامل ہیں۔ اس کے علاوہ 270 ممنوعہ اشیاء، 928 بار تمباکو اور اس کی مصنوعات کی اسمگلنگ ناکام بنائی گئی، جبکہ مالی رقوم کی 17 اقسام اور اسلحہ و اس کے لوازمات کی 4 اقسام بھی ضبط کی گئیں۔

زاتکا نے اس عزم کا اعادہ کیا کہ وہ مملکت کی درآمدات و برآمدات پر کسٹمز کنٹرول مزید سخت کرے گی تاکہ معاشرے کا تحفظ یقینی بنایا جا سکے۔ اس مقصد کے لیے متعلقہ اداروں کے ساتھ مسلسل تعاون اور رابطہ جاری ہے۔

زاتکا نے عوام سے اپیل کی ہے کہ وہ اسمگلنگ کی روک تھام اور قومی معیشت کے تحفظ کے لیے تعاون کریں۔ اس مقصد کے لیے سیکیورٹی شکایات کے لیے مخصوص نمبر (1910)، ای میل ([email protected]) یا بین الاقوامی نمبر (009661910) پر رابطہ کیا جا سکتا ہے۔ ان ذرائع سے موصول ہونے والی معلومات کو مکمل رازداری میں رکھا جاتا ہے اور درست اطلاع دینے والے کو مالی انعام بھی دیا جاتا ہے۔