سعودی عرب میں آج گرج چمک کے ساتھ بارش اور تیز ہوائیں متوقع

قومی مرکز برائے موسمیات نے اپنی رپورٹ میں بتایا ہے کہ آج منگل کو جازان، عسیر، باحہ اور مکہ مکرمہ کے مختلف علاقوں میں درمیانے سے شدید درجے کی گرج چمک کے ساتھ بارشیں متوقع ہیں، جو سیلابی ریلوں کا سبب بن سکتی ہیں اور ان کے ساتھ ژالہ باری بھی ہو سکتی ہے۔ نجران کے کچھ حصوں میں ہلکی سے درمیانے درجے کی بارش کا امکان ہے۔

رپورٹ میں مزید کہا گیا ہے کہ ان علاقوں کے علاوہ مشرقی ریجن اور مدینہ منورہ کے کچھ حصوں میں بھی تیز ہوائیں چلنے اور گرد و غبار اٹھنے کا امکان ہے۔

مزید بتایا گیا ہے کہ بحیرہ احمر میں سطحی ہوائیں شمال مغرب سے مغرب کی سمت 10 سے 38 کلومیٹر فی گھنٹہ کی رفتار سے چلیں گی، جبکہ لہروں کی اونچائی آدھے میٹر سے ڈیڑھ میٹر تک ہوگی اور سمندر کی حالت ہلکی سے درمیانی رہے گی۔

خلیج عرب میں سطحی ہوائیں شمال مغرب سے شمال کی سمت 20 سے 45 کلومیٹر فی گھنٹہ کی رفتار سے چلیں گی، جبکہ لہروں کی اونچائی ایک میٹر سے دو میٹر تک ہوگی اور سمندر کی حالت درمیانی رہے گی۔