سعودی عرب کے مختلف علاقوں میں موسلا دھار بارش اور سیلاب کا امکان

محکمہ موسمیات نے اپنی روزانہ کی رپورٹ میں پیش گوئی کی ہے کہ آج مملکت کے کئی علاقوں میں درمیانے سے شدید درجے کی گرج چمک کے ساتھ بارشیں ہوں گی، جن سے سیلابی صورتحال پیدا ہو سکتی ہے۔ ان بارشوں کے ساتھ ژالہ باری اور گرد آلود تیز ہوائیں بھی متوقع ہیں۔ یہ صورتحال جازان، عسیر، الباحہ، مکہ مکرمہ، مدینہ منورہ، حائل، تبوک، الجوف اور شمالی حدود کے کچھ حصوں میں دیکھی جا سکتی ہے۔

رپورٹ میں مزید بتایا گیا ہے کہ ریاض اور مشرقی ریجن کے جنوبی حصوں کے علاوہ نجران کے کچھ علاقوں میں ہلکی سے درمیانی بارش متوقع ہے۔ تبوک، مدینہ منورہ، مکہ مکرمہ اور مشرقی ریجن کے ساحلی علاقوں میں رات اور صبح کے اوقات میں دھند چھائے رہنے کا امکان ہے۔

ہوا اور سمندر کی صورتحال

محکمہ موسمیات کے مطابق بحیرہ احمر کے شمالی حصے میں سطحی ہوائیں شمال مغربی سے شمالی سمت میں 12 سے 38 کلومیٹر فی گھنٹہ کی رفتار سے چلیں گی، جبکہ گرج چمک کے ساتھ بارش کے دوران یہ رفتار 50 کلومیٹر فی گھنٹہ سے بھی تجاوز کر سکتی ہے۔ درمیانی حصے میں ہوائیں شمال مغربی سے شمال مشرقی سمت میں 10 سے 32 کلومیٹر فی گھنٹہ اور جنوبی حصے میں جنوب مشرقی سے جنوب مغربی سمت میں 15 سے 35 کلومیٹر فی گھنٹہ کی رفتار سے چلیں گی، جو باب المندب کی سمت میں 50 کلومیٹر فی گھنٹہ سے زیادہ ہو سکتی ہیں اور اس دوران بارش کا سلسلہ جاری رہے گا۔

موجوں کی اونچائی آدھے میٹر سے ڈیڑھ میٹر تک رہ سکتی ہے، جبکہ گرج چمک کے ساتھ بارش کے دوران یہ دو میٹر سے بھی زیادہ ہو سکتی ہے۔ سمندر کی حالت عمومی طور پر ہلکی سے درمیانی موج کی رہے گی، تاہم باب المندب کے قریب سمندر میں تلاطم آ سکتا ہے۔

خلیج عرب میں شمالی حصے میں ہوائیں شمال مغربی سے مغربی سمت میں 10 سے 28 کلومیٹر فی گھنٹہ کی رفتار سے چلیں گی، جبکہ جنوبی حصے میں مغربی سے جنوب مغربی سمت کی ہوائیں رات کے وقت مشرقی اور پھر شمال مشرقی سمت میں بدل جائیں گی۔ موجوں کی اونچائی آدھے میٹر سے ایک میٹر تک رہے گی اور سمندر کی حالت ہلکی موج کی متوقع ہے۔