سودان کی حوثی حملے کی مذمت، سعودی عرب سے مکمل اظہار یکجہتی

حکومتِ جمہوریہ سودان نے مکہ مکرمہ پر حوثی ملیشیا کے ڈرون حملے کی شدید ترین الفاظ میں مذمت کی ہے اور اسے دنیا بھر کے مسلمانوں کے جذبات کو شدید اشتعال دلانے والا اقدام قرار دیا ہے۔

سودانی وزارت خارجہ و بین الاقوامی تعاون کی جانب سے جاری بیان میں کہا گیا ہے کہ مکہ مکرمہ اور بیت اللہ الحرام کو نشانہ بنانا ایک سنگین جرم اور اسلامی مقدسات کی حرمت کی کھلی خلاف ورزی ہے۔

وزارت نے واضح کیا کہ حرمین شریفین، مقدس مقامات اور ان کے زائرین کی سلامتی و حرمت ناقابلِ سمجھوتہ ہے، اور ان مقامات کو کسی بھی دشمنانہ کارروائی یا تنازعات میں استعمال کرنا انتہائی خطرناک اور قابل مذمت ہے۔

سودانی حکومت نے مقدس مقامات کے احترام اور انہیں کسی بھی قسم کے تصادم سے دور رکھنے کی اہمیت پر زور دیا، تاکہ سعودی عرب اور پورے خطے کا امن و استحکام برقرار رہے۔

اسی تناظر میں، بیان میں سعودی عرب کے ساتھ سودان کی مکمل یکجہتی اور اس کے جائز حق کی حمایت کا اعادہ کیا گیا ہے کہ وہ اپنی سرزمین، حرمین شریفین اور ضیوف الرحمن کے تحفظ کے لیے جو بھی اقدامات ضروری سمجھے، وہ کرے۔