البکریہ میں صحت میلہ، 35 سے زائد اداروں کی شرکت

امیر قصیم شہزادہ ڈاکٹر فیصل بن مشعل بن سعود بن عبدالعزیز کی سرپرستی میں محافظ البکریہ محمد بن علی العریفی نے گزشتہ روز البکریہ صحت میلہ کا افتتاح کیا، جسے مقامی مریضوں کی فلاحی تنظیم نے کنگ عبداللہ کلچرل سینٹر میں منعقد کیا۔

تین روزہ اس میلے میں 35 سے زائد ادارے شریک ہیں، جہاں صحت عامہ، متوازن غذائیت، صحت مند طرزِ زندگی، خواتین و بچوں کی صحت، ادویات، ذہنی صحت، نیند کی خرابیوں اور الیکٹرانک آلات کے نقصانات سے متعلق آگاہی اسٹالز لگائے گئے ہیں۔

میلے میں مفت طبی معائنے اور مشاورتی سہولیات کے علاوہ ورکشاپس، صحت سے متعلق نشستیں اور تربیتی کورسز بھی پیش کیے جا رہے ہیں، جن سے مختلف شعبہ ہائے زندگی سے تعلق رکھنے والے افراد مستفید ہو سکتے ہیں۔

منتظمین کے مطابق اس میلے کا مقصد صحت سے متعلق شعور اجاگر کرنا، احتیاطی تدابیر کو فروغ دینا اور معاشرے کے افراد کو صحت مند طرزِ زندگی اپنانے کی ترغیب دینا ہے، جس کے لیے آگاہی پروگرامز اور صحت و تربیتی خدمات فراہم کی جا رہی ہیں۔