سعودی کابینہ کا 12 اہم فیصلوں کی منظوری، قومی خلائی پالیسی بھی شامل

ولی عہد اور وزیراعظم شہزادہ محمد بن سلمان بن عبدالعزیز آل سعود نے آج ریاض میں کابینہ اجلاس کی صدارت کی۔

اجلاس کے آغاز میں کابینہ نے خادم الحرمین الشریفین اور ولی عہد کو ملائیشیا کے سلطان کی جانب سے موصولہ دو خطوط، ولی عہد کی طرف سے چینی صدر کو بھیجے گئے پیغام اور حالیہ دنوں میں کوریا، رومانیہ اور اسپین کے رہنماؤں سے ہونے والی ٹیلیفونک گفتگوؤں کے علاوہ اردن کے ولی عہد کے استقبال کے نتائج کا جائزہ لیا۔

کابینہ نے عالمی حالات اور سعودی عرب کی سفارتی کوششوں کا بھی جائزہ لیا، جو خطے کے امن، استحکام اور ترقی کے فروغ کے لیے دوست ممالک کے ساتھ مل کر جاری ہیں۔ اس موقع پر وطن کے دفاع اور اس کی خودمختاری کے عزم کا اعادہ کیا گیا۔

وزیر اطلاعات سلمان الدوسری نے بتایا کہ کابینہ نے خلیجی تعاون کونسل اور جی 20 اجلاسوں میں سعودی عرب کی شرکت اور عالمی چیلنجز کے حل میں تعاون کے لیے کی جانے والی کوششوں کا جائزہ لیا، خصوصاً سمندری نقل و حمل، توانائی، غذائی تحفظ، تجارت اور سپلائی چین کے شعبوں میں۔

کابینہ نے عالمی برادری سے مطالبہ کیا کہ وہ سمندری نقل و حمل اور توانائی کی فراہمی کو لاحق خطرات کے خلاف فوری اقدامات کرے اور بین الاقوامی قانون پر عمل درآمد کو یقینی بنائے۔ سعودی عرب نے ان تمام خلاف ورزیوں کو مسترد کیا جو سمندری سلامتی اور توانائی کی فراہمی کے لیے خطرہ ہیں۔

کابینہ نے اس عزم کا اعادہ کیا کہ سعودی عرب عالمی منڈیوں کو توانائی کی فراہمی میں اپنا کردار قابل اعتماد طریقے سے جاری رکھے گا، جس کے لیے طویل المدتی سرمایہ کاری، انفراسٹرکچر، ذخیرہ اندوزی اور سپلائی چین کو مضبوط بنایا جا رہا ہے۔

اجلاس میں ایجنڈے پر موجود امور پر غور کے بعد درج ذیل فیصلے کیے گئے:

• ہیئت برائے جوہری و شعاعی نگرانی کے سربراہ کو جنوبی افریقہ اور برازیل کے ساتھ جوہری و شعاعی نگرانی میں معلومات کے تبادلے کے لیے مفاہمتی یادداشتوں پر بات چیت کا اختیار دیا گیا۔
• ادارہ شاہ عبدالعزیز کے سربراہ کو مصر کے ساتھ اسکندریہ لائبریری کے ساتھ تعاون کے معاہدے پر بات چیت کا اختیار دیا گیا۔
• ہندوستان کے ساتھ آبی وسائل کے شعبے میں مفاہمتی یادداشت کی منظوری دی گئی۔
• وزیر افرادی وسائل کو شام کے ساتھ لیبر مارکیٹ اور مہارتوں کی ترقی کے لیے مفاہمتی یادداشت پر بات چیت کا اختیار دیا گیا۔
• پاکستان کے ساتھ وزارت داخلہ میں سائنسی، تربیتی اور تحقیقی تعاون کے لیے مفاہمتی یادداشت کی منظوری دی گئی۔
• مراکش کے ساتھ نشریاتی اور ٹیلی ویژن شعبے میں مفاہمتی یادداشت کی منظوری دی گئی۔
• قومی خلائی پالیسی کی منظوری دی گئی۔
• سرکاری اوقاف کے مالیاتی حسابات کی نگرانی کے قواعد کی منظوری دی گئی۔
• نمائشوں اور کانفرنسوں کی اتھارٹی کے بعض اختیارات نیشنل ایونٹس سینٹر اور سعودی سرمایہ کاری مارکیٹنگ اتھارٹی کو منتقل کرنے کی منظوری دی گئی۔
• نیشنل سینٹر فار ویجیٹیشن کور اور انسداد صحرا کاری کے بورڈ میں نئے ارکان کی تقرری کی گئی۔

کابینہ نے مزید متعدد امور پر بھی ضروری ہدایات جاری کیں، جن میں مختلف سرکاری اداروں کی سالانہ رپورٹس، چودہویں گریڈ اور وزیر مفوض کے عہدوں پر ترقی و تقرریاں شامل ہیں۔