سعودی عرب میں آج بارش، ژالہ باری اور تیز ہوائیں متوقع

محکمہ موسمیات نے بدھ کے روز اپنی رپورٹ میں پیش گوئی کی ہے کہ آج جازان، عسیر، الباحہ، مکہ مکرمہ، مدینہ منورہ، حائل، الجوف، شمالی حدود کے علاوہ قصیم اور مشرقی ریجن کے شمالی حصوں میں گرج چمک کے ساتھ بارش، ژالہ باری اور گرد و غبار کے طوفان کے ساتھ تیز ہوائیں چلنے کا امکان ہے۔ ان علاقوں کے بعض حصوں میں دھند بھی چھا سکتی ہے۔

رپورٹ کے مطابق بحیرہ احمر کے شمالی حصے میں سطحی ہوائیں شمال مغربی سے شمال کی سمت 18 تا 38 کلومیٹر فی گھنٹہ کی رفتار سے چلیں گی جو خلیج عقبہ کی طرف 48 کلومیٹر فی گھنٹہ تک پہنچ سکتی ہیں۔ درمیانی حصے میں ہوائیں شمال مغربی سے شمال کی سمت 12 تا 35 کلومیٹر فی گھنٹہ جبکہ جنوبی حصے میں جنوب مشرقی سے مشرق کی سمت 12 تا 32 کلومیٹر فی گھنٹہ کی رفتار سے چلیں گی اور باب المندب کی طرف 50 کلومیٹر فی گھنٹہ تک پہنچ سکتی ہیں۔

موجوں کی اونچائی شمالی حصے میں ایک سے ڈیڑھ میٹر جبکہ خلیج عقبہ کی سمت دو میٹر تک ہو سکتی ہے۔ درمیانی حصے میں نصف میٹر سے ڈیڑھ میٹر اور جنوبی حصے میں نصف میٹر سے ڈیڑھ میٹر تک جبکہ باب المندب کی سمت دو میٹر سے زائد ہو سکتی ہے۔ شمالی اور درمیانی حصے میں سمندر درمیانے درجے کی موجوں والا جبکہ جنوبی حصے میں ہلکی سے درمیانی موجوں والا اور باب المندب کی سمت موجوں میں شدت آ سکتی ہے۔

خلیج عرب میں ہوائیں شمالی سے شمال مغربی سمت 10 تا 35 کلومیٹر فی گھنٹہ کی رفتار سے شمالی حصے میں چلیں گی جبکہ جنوبی حصے میں جنوب مغربی سے شمال مغربی سمت 10 تا 32 کلومیٹر فی گھنٹہ کی رفتار سے چلیں گی اور بعض اوقات 50 کلومیٹر فی گھنٹہ سے تجاوز کر سکتی ہیں، خاص طور پر جب گرج چمک کے ساتھ بارش والے بادل بنیں۔ موجوں کی اونچائی نصف میٹر سے ڈیڑھ میٹر تک اور بعض اوقات دو میٹر سے زیادہ ہو سکتی ہے۔ شمالی و جنوبی حصوں میں بارش والے بادل بننے پر سمندر ہلکی سے درمیانی موجوں والا اور بعض اوقات پرموج ہو سکتا ہے۔