سعودی عرب کے مختلف علاقوں میں آج موسلا دھار بارش اور سیلاب کا امکان

قومی مرکز برائے موسمیات نے جمعہ کے روز اپنی موسمی رپورٹ میں پیش گوئی کی ہے کہ آج ملک کے مختلف حصوں میں درمیانے سے لے کر موسلا دھار بارشیں متوقع ہیں، جو سیلاب کا سبب بن سکتی ہیں۔ ان بارشوں کے ساتھ ژالہ باری اور گرد آلود تیز ہوائیں بھی چلیں گی، جس سے افقی حد نگاہ تقریباً نہ ہونے کے برابر رہ جائے گی۔ یہ صورتحال جازان، عسیر، الباحہ، مکہ مکرمہ کے علاوہ حائل، الجوف اور شمالی سرحدی علاقوں کے بعض حصوں میں پیش آ سکتی ہے۔

رپورٹ کے مطابق مدینہ منورہ، تبوک اور مشرقی ریجن کے کچھ حصوں میں ہلکی سے درمیانے درجے کی بارشیں متوقع ہیں۔ مدینہ منورہ، مکہ مکرمہ اور مشرقی ریجن کے ساحلی علاقوں میں رات اور صبح کے اوقات میں دھند چھائے رہنے کا امکان ہے۔

ہواؤں کی رفتار اور سمندر کی کیفیت

رپورٹ میں بتایا گیا ہے کہ بحیرہ احمر کے شمالی حصے میں سطحی ہوائیں شمال مغربی سے شمالی سمت میں 15 سے 35 کلومیٹر فی گھنٹہ کی رفتار سے چلیں گی۔ درمیانی حصے میں ہوائیں شمال مغربی سے جنوب مغربی سمت میں 15 سے 30 کلومیٹر فی گھنٹہ کی رفتار سے چلیں گی، تاہم گرج چمک کے ساتھ بارش کے دوران یہ رفتار 60 کلومیٹر فی گھنٹہ سے بھی تجاوز کر سکتی ہے۔ جنوبی حصے میں ہوائیں جنوب مشرقی سے جنوب مغربی سمت میں 15 سے 30 کلومیٹر فی گھنٹہ کی رفتار سے چلیں گی اور یہاں بھی رفتار 60 کلومیٹر فی گھنٹہ سے زیادہ ہو سکتی ہے۔

موجوں کی بلندی شمالی حصے میں نصف میٹر سے ڈیڑھ میٹر تک رہے گی، درمیانی حصے میں بھی یہی صورت حال ہوگی تاہم بعض اوقات دو میٹر سے زیادہ بھی ہو سکتی ہے۔ جنوبی حصے میں بھی نصف میٹر سے ڈیڑھ میٹر تک اور بعض اوقات دو میٹر سے زائد تک موجیں بلند ہو سکتی ہیں۔ شمالی حصے میں سمندر کی کیفیت ہلکی سے درمیانی موج کے ساتھ رہے گی، جبکہ درمیانی اور جنوبی حصوں میں بھی عمومی طور پر ہلکی سے درمیانی موج رہے گی، تاہم بعض اوقات سمندر پر تلاطم آ سکتا ہے۔

خلیج عرب میں شمالی حصے میں ہوائیں جنوب مغربی سے جنوب مشرقی سمت میں 10 سے 25 کلومیٹر فی گھنٹہ کی رفتار سے چلیں گی، جبکہ گرج چمک کے ساتھ بارش کے دوران یہ رفتار 50 کلومیٹر فی گھنٹہ سے زیادہ ہو سکتی ہے۔ جنوبی حصے میں ہوائیں شمال مغربی سے شمال مشرقی سمت میں تقریباً یہی رفتار برقرار رکھیں گی۔ موجوں کی بلندی نصف میٹر سے ایک میٹر تک رہے گی اور بعض علاقوں میں دو میٹر سے بھی زیادہ ہو سکتی ہے، جبکہ سمندر کی کیفیت ہلکی موج سے تلاطم خیز رہنے کا امکان ہے۔