سعودی عرب کے کئی علاقوں میں بارش اور سیلاب کا امکان

محکمہ موسمیات نے پیر کے روز اپنی رپورٹ میں بتایا ہے کہ آج جنوبی اور مغربی سعودی عرب کے کئی علاقوں میں درمیانے سے شدید درجے کی گرج چمک کے ساتھ بارش متوقع ہے، جس کے باعث سیلابی صورتحال پیدا ہو سکتی ہے۔ ان بارشوں کے ساتھ ژالہ باری اور گرد آلود تیز ہوائیں بھی چلنے کا امکان ہے۔ متاثرہ علاقوں میں جازان، عسیر، الباحہ اور مکہ مکرمہ شامل ہیں۔

رپورٹ میں مزید کہا گیا ہے کہ مدینہ منورہ، تبوک، الجوف، حائل، شمالی حدود اور نجران کے بعض حصوں میں ہلکی سے درمیانے درجے کی بارش متوقع ہے، جبکہ مشرقی ریجن اور مکہ مکرمہ کے ساحلی علاقوں میں دھند چھانے کا امکان ہے۔

سمندر اور ہواؤں کی صورتحال

محکمہ موسمیات کے مطابق بحیرہ احمر میں سطحی ہوائیں شمال مغرب سے مغرب کی سمت 25 سے 45 کلومیٹر فی گھنٹہ کی رفتار سے چلیں گی، جبکہ بعض اوقات جنوب مغرب سے شمال مغرب کی سمت 10 سے 30 کلومیٹر فی گھنٹہ رہیں گی۔ گرج چمک کے ساتھ بارش کے دوران ہواؤں کی رفتار 50 کلومیٹر فی گھنٹہ تک پہنچ سکتی ہے۔

سمندر میں لہروں کی اونچائی آدھا میٹر سے ایک میٹر تک رہے گی، تاہم گرج چمک کے ساتھ بارش کے دوران یہ دو میٹر سے بھی تجاوز کر سکتی ہے۔ عام حالات میں سمندر ہلکا سے درمیانہ اور بارش کے دوران موجزن ہو جائے گا۔

خلیج عرب میں سطحی ہوائیں جنوب مغرب سے شمال مغرب کی سمت 10 سے 30 کلومیٹر فی گھنٹہ کی رفتار سے چلیں گی، جبکہ لہروں کی اونچائی آدھا میٹر سے ایک میٹر تک رہے گی اور سمندر ہلکی لہروں والا رہے گا۔