سعودی عرب کی پاکستان میں مسجد پر حملے کی شدید مذمت

سعودی عرب نے خیبر پختونخوا کے شمال مغرب میں واقع ایک مسجد پر دہشت گرد حملے کی شدید مذمت کی ہے، جس کے نتیجے میں متعدد افراد جاں بحق اور زخمی ہوئے۔ سعودی عرب نے عبادت گاہوں کو نشانہ بنانے، پُرامن شہریوں کو خوفزدہ کرنے اور معصوم جانوں کے ضیاع کی سخت مخالفت کی ہے۔

سعودی وزارت خارجہ نے کہا ہے کہ مملکت اس حملے کی شدید مذمت کرتی ہے اور ہر قسم کے تشدد، انتہا پسندی اور دہشت گردی کو مسترد کرنے کے اپنے اصولی مؤقف پر قائم ہے، چاہے اس کے اسباب یا جواز کچھ بھی ہوں۔

سعودی عرب نے ہر طرح کے تشدد، انتہا پسندی اور دہشت گردی کے خلاف اسلامی جمہوریہ پاکستان کے ساتھ مکمل یکجہتی کا اظہار کیا ہے اور حکومت و عوام کے ساتھ کھڑے ہونے کا اعادہ کیا ہے۔

مملکت نے جاں بحق افراد کے اہل خانہ اور پاکستان کی حکومت و عوام سے دلی تعزیت اور ہمدردی کا اظہار کرتے ہوئے زخمیوں کی جلد صحت یابی کی دعا کی ہے۔