مصر اور رابطہ عالم اسلامی کی سعودی عرب پر حوثی حملوں کی مذمت

مصر نے سعودی عرب کے دارالحکومت ریاض پر ہونے والے حملوں کی شدید الفاظ میں مذمت کی ہے اور انہیں مملکت اور پورے خطے کے امن و استحکام اور بین الاقوامی قوانین کی کھلی خلاف ورزی قرار دیا ہے۔ مصر نے کہا کہ یہ ایک خطرناک اقدام ہے جو خطے میں کشیدگی اور عدم استحکام کو بڑھا سکتا ہے۔

وزارت خارجہ کے بیان میں مصر نے سعودی عرب کی سلامتی اور خودمختاری کو نقصان پہنچانے کی کسی بھی کوشش کو مکمل طور پر مسترد کیا اور مملکت کے ساتھ مکمل یکجہتی اور اس کی سلامتی و استحکام کے لیے کیے جانے والے تمام اقدامات کی حمایت کا اعادہ کیا۔ مصر نے کہا کہ سعودی عرب اور مصر کی سلامتی ایک دوسرے سے جدا نہیں۔

اسی طرح رابطہ عالم اسلامی نے بھی سخت الفاظ میں حوثی ملیشیا کی جانب سے سعودی عرب پر جاری حملوں اور ریاض سمیت بیش، طائف، فرسان اور ينبع میں شہریوں اور شہری تنصیبات کو نشانہ بنانے کی کوششوں کی مذمت کی، جنہیں سعودی فضائی دفاع نے اللہ کے فضل سے ناکام بنا دیا۔

رابطہ کے سیکریٹری جنرل اور علماء کونسل کے سربراہ ڈاکٹر محمد بن عبد الکریم العیسی نے اپنے بیان میں ان دہشت گردانہ حملوں کی شدید مذمت کی جو تمام مذہبی اقدار اور بین الاقوامی و انسانی قوانین کی خلاف ورزی ہیں اور حوثی ملیشیا کے مجرمانہ طرز عمل اور شہریوں و شہری تنصیبات کو جان بوجھ کر نشانہ بنانے کی عکاسی کرتے ہیں۔

معالی سیکریٹری جنرل نے رابطہ کی عالمی تنظیموں، اداروں اور تمام اسلامی اقوام کی جانب سے سعودی عرب کے ساتھ مکمل یکجہتی اور اس کی سلامتی، شہریوں اور مقیم افراد کے تحفظ کے لیے کیے جانے والے تمام اقدامات کی حمایت کا اعادہ کیا اور دعا کی کہ اللہ تعالیٰ مملکت کو ہر قسم کی برائی اور مصیبت سے محفوظ رکھے۔