وزیر ثقافت نے شاہی انسٹی ٹیوٹ برائے انسانیات کی منظوری کو سراہا

وزیر ثقافت شہزادہ بدر بن عبداللہ بن فرحان نے مجلس وزراء کی جانب سے شاہی انسٹی ٹیوٹ برائے انسانیات اور ثقافتی مطالعات کے تنظیمی انتظامات کی منظوری کو سراہا ہے۔

وزیر ثقافت نے خادم الحرمین الشریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کا سعودی ثقافتی شعبے کی غیر محدود حمایت پر شکریہ ادا کیا۔ انہوں نے کہا کہ اس حمایت سے جامع ثقافتی ترقی اور مقامی و بین الاقوامی سطح پر ثقافتی سرگرمیوں کو فروغ ملا ہے۔

یہ تنظیمی انتظامات رواں سال مارچ میں انسٹی ٹیوٹ کے قیام کی مجلس وزراء سے منظوری کے تسلسل میں کیے گئے ہیں۔

یہ انسٹی ٹیوٹ انسانیات اور ثقافتی مطالعات کے شعبے میں علمی و عملی تحقیق، اور سعودی معاشرے کے مختلف پہلوؤں کا مطالعہ کرے گا۔ اس کے تحت رہن سہن کے انداز، علامتی نظام، سماجی تبدیلیاں اور ثقافتی اظہار کی مختلف صورتوں کا جائزہ اور تجزیہ کیا جائے گا۔

انسٹی ٹیوٹ مملکت کے ثقافتی شعبے کے لیے ایک علمی معاون ادارہ ہوگا، جو علمی تحقیق اور عملی مطالعات کو یکجا کرے گا اور سعودی معاشرے اور اس کے ثقافتی ورثے سے متعلق خصوصی علم کی تیاری میں مدد دے گا۔ یہ سب کچھ سعودی وژن 2030 کے تحت قومی ثقافتی حکمت عملی کے اہداف کے مطابق ہوگا۔