سعودی تعلیمی نصاب میں ہر سال جدیدیت، مارکیٹ کی ضروریات سے ہم آہنگی

تعلیمی مشیر عبداللطیف الحمادی نے کہا ہے کہ تعلیمی نصاب ہر سال اپ ڈیٹ کیا جاتا ہے۔

انہوں نے الاخباریہ چینل سے گفتگو میں بتایا کہ یہ عمل مختلف اداروں کے تعاون سے انجام پاتا ہے، جس کا مقصد نصاب کو جدید بنانا اور اسے سعودی لیبر مارکیٹ کی ضروریات کے مطابق ڈھالنا ہے۔

ان کا مزید کہنا تھا کہ اس اپ ڈیٹ کا مقصد ایسا مربوط اور جدید نصاب تیار کرنا ہے جس میں طلبہ کو مصنوعی ذہانت، سائبر سکیورٹی، صنعت اور ٹیکنالوجی جیسے مضامین پڑھائے جائیں۔ انہوں نے بتایا کہ اس تبدیلی کے ساتھ اساتذہ اور معلمات کی تربیت بھی کی جائے گی تاکہ وہ اس تعلیمی ترقی کے ساتھ ہم آہنگ رہ سکیں۔

وزیر تعلیم یوسف البنیان نے بھی اس حوالے سے بتایا کہ نئے تعلیمی سال کے نصاب میں 22 مضامین کو اپ ڈیٹ کیا گیا ہے جبکہ مصنوعی ذہانت کے 50 تعلیمی یونٹس بھی شامل کیے گئے ہیں، جو مملکت میں تعلیمی نظام کی ترقی کے منصوبے کا حصہ ہیں۔

یوسف البنیان نے کہا کہ وزارت نے گزشتہ تین برسوں کے دوران مملکت کے تمام اسکولوں کا جائزہ لیا ہے تاکہ تعلیمی نتائج کو بہتر بنایا جا سکے۔ انہوں نے مزید بتایا کہ اساتذہ کے لیے ایک جامع تربیتی اور پیشہ ورانہ ترقیاتی منصوبہ بھی تیار کیا گیا ہے، جو تعلیمی نظام کی سب سے بڑی تربیتی اسکیموں میں سے ایک ہے۔

اعرض التغريدة على منصة X