سعودی کسٹمز نے ایک ہفتے میں 1075 ممنوعہ اشیا ضبط کیں

سعودی عرب کے بری، بحری اور فضائی کسٹمز نے اعلان کیا ہے کہ ایک ہفتے کے دوران 1075 ممنوعہ اشیا ضبط کی گئی ہیں۔ یہ کارروائیاں زکاة، ٹیکس اور کسٹمز اتھارٹی (زاتکا) کی جانب سے سیکیورٹی کو مضبوط بنانے اور معاشرے کو مختلف اقسام کی ممنوعہ اشیا سے محفوظ رکھنے کی مسلسل کوششوں کا حصہ ہیں۔

ضبط شدہ اشیا میں 71 اقسام کی منشیات شامل ہیں، جن میں حشیش، کوکین، ہیروئن، شبو، کیپٹاگون گولیاں اور دیگر منشیات شامل ہیں۔ اس کے علاوہ 390 اقسام کی دیگر ممنوعہ اشیا بھی ضبط کی گئیں۔

کسٹمز کے مختلف مراکز پر 2234 پیکٹ تمباکو اور اس کی مصنوعات، 39 اقسام کی مالی رقوم اور اسلحہ و اس کے لوازمات کی دو اقسام بھی پکڑی گئیں۔

زاتکا نے اس عزم کا اعادہ کیا ہے کہ وہ مملکت کی درآمدات اور برآمدات پر کسٹمز نگرانی کو مزید سخت کرے گی، تاکہ معاشرتی تحفظ کو یقینی بنایا جا سکے۔ اس مقصد کے لیے متعلقہ اداروں کے ساتھ مسلسل تعاون اور رابطہ جاری ہے۔

ساتھ ہی زاتکا نے عوام سے اپیل کی ہے کہ وہ اسمگلنگ کی روک تھام اور معاشرتی و قومی معیشت کے تحفظ کے لیے تعاون کریں۔ اس مقصد کے لیے سیکیورٹی شکایات کے لیے مخصوص نمبر (1910)، ای میل ([email protected]) یا بین الاقوامی نمبر (009661910) پر رابطہ کیا جا سکتا ہے۔ ان ذرائع کے ذریعے اسمگلنگ اور کسٹمز قوانین کی خلاف ورزیوں کی اطلاع مکمل رازداری کے ساتھ دی جا سکتی ہے، اور درست اطلاع دینے والے کو مالی انعام بھی دیا جائے گا۔