ریاض، نجران اور وادی الدواسر میں سول ڈیفنس کا ہنگامی انتباہ

سعودی محکمہ سول ڈیفنس نے اعلان کیا ہے کہ ریاض، نجران اور وادی الدواسر میں ہنگامی حالات کے لیے قومی انتباہی پلیٹ فارم کے ذریعے انتباہ جاری کیا گیا ہے، تاکہ ممکنہ خطرے سے خبردار کیا جا سکے۔

سول ڈیفنس نے شہریوں سے اپیل کی ہے کہ انتباہی پیغام موصول ہونے پر پرسکون رہیں، سرکاری ہدایات پر عمل کریں اور فوراً کسی محفوظ عمارت یا اندرونی کمرے میں چلے جائیں، کھڑکیوں سے دور رہیں اور خطرہ ٹلنے تک وہیں قیام کریں۔ اس سے پہلے ہرگز گھر یا عمارت سے باہر نہ نکلیں۔

محکمہ نے ہدایت کی ہے کہ کھلی جگہوں اور شیشے کے قریب جانے سے گریز کریں، بالکونی یا چھت پر نہ جائیں، اور اگر باہر ہیں تو قریبی عمارت میں پناہ لیں یا کسی مضبوط دیوار کے پیچھے ہو جائیں۔ ہجوم اور تصویربرداری سے اجتناب کریں اور خطرناک مقامات سے دور رہیں۔

اگر کوئی شخص گاڑی چلا رہا ہو اور اسے انتباہی پیغام ملے تو وہ فوراً سڑک کے کنارے رک جائے، پلوں اور بلند عمارتوں سے دور رہے۔

مزید برآں، مکہ مکرمہ، مدینہ منورہ، ریاض اور مشرقی ریجن میں کسی بھی خطرے کی صورت میں ہنگامی نمبر 911 اور مملکت کے دیگر علاقوں میں 998 پر رابطہ کریں اور صرف سرکاری ذرائع سے ہدایات حاصل کریں۔