سعودی عرب کو گھوڑوں کی بیماری 'الدورين' سے پاک قرار

عالمی ادارہ صحت حیوانات (WOAH) نے سعودی عرب کو گھوڑوں میں پائی جانے والی بیماری 'الدورين' سے باضابطہ طور پر مکمل طور پر پاک قرار دینے کی منظوری دے دی ہے۔ یہ اعلان اس وقت سامنے آیا جب مملکت نے عالمی سطح پر تسلیم شدہ تمام قواعد و معیارات پر مکمل عملدرآمد کیا۔

ادارے نے واضح کیا کہ یہ اعتراف قومی مرکز برائے انسداد آفات نباتات و امراض حیوانات (وقاء) کی جانب سے پیش کردہ تکنیکی فائل کے جامع جائزے کے بعد سامنے آیا، جس میں وبائی نگرانی کے طریقہ کار، فیلڈ سروے کی درستگی اور مملکت بھر میں نافذ سخت احتیاطی تدابیر کو دستاویزی شکل دی گئی تھی۔

یہ منظوری قومی سطح پر گھوڑوں کے شعبے کے تحفظ اور ویٹرنری نظام کی بہتری کے لیے جاری اسٹریٹجک منصوبوں کی کامیابی کی عکاس ہے، جس سے مملکت میں عالمی سطح کی گھڑ سواری کی چیمپئن شپ کے انعقاد اور گھوڑوں کی دوڑ کے شعبے کو فروغ ملے گا۔

یہ بین الاقوامی اعزاز مملکت میں ویٹرنری خدمات کے اعلیٰ معیار اور قومی افرادی قوت کی مہارت کو اجاگر کرتا ہے، نیز سرحد پار بیماریوں کی روک تھام اور مویشیوں کے تحفظ کے لیے حفاظتی اقدامات کی قابل اعتمادیت کو بھی ثابت کرتا ہے۔

واضح رہے کہ عالمی ادارہ صحت حیوانات نے رواں سال سعودی عرب کو گھوڑوں میں وائرل آرٹریٹس سے پاک قرار دیا تھا، جبکہ گزشتہ برس بھی متعدد امراض جیسے رعام، گھوڑوں کی انیمیا اور افریقی گھوڑوں کے طاعون سے پاک ہونے کا اعلان کیا گیا تھا۔ یہ سب مملکت کی جانب سے عالمی معیار کے مطابق ویٹرنری اقدامات اور سروے کی کامیابی اور صحت حیوانات کے تحفظ میں اس کی قیادت اور اعتماد کی دلیل ہے، جو بڑی گھڑ سواری چیمپئن شپ اور گھوڑوں کی دوڑ کے انعقاد میں معاون ہے۔