شام کا سعودی عرب سے مکمل اظہار یکجہتی، حوثی حملوں کی مذمت

شام نے شدید الفاظ میں حوثی ملیشیا کی جانب سے سعودی عرب کے شہروں ابہا، خمیس مشیط، جازان اور نجران میں شہری اور معاشی تنصیبات کو نشانہ بنانے کی مذمت کی ہے، جن حملوں کے نتیجے میں متعدد شہری، جن میں خواتین اور بچے بھی شامل ہیں، زخمی ہوئے۔

شامی وزارت خارجہ و تارکین وطن نے اپنے بیان میں سعودی عرب کے ساتھ مکمل یکجہتی کا اظہار کرتے ہوئے کہا ہے کہ دمشق سعودی عرب کی خودمختاری، سلامتی اور ارضی سالمیت کے تحفظ کے لیے کیے جانے والے تمام اقدامات کی حمایت کرتا ہے، جو بین الاقوامی قانون اور اقوام متحدہ کے منشور کے مطابق ہیں۔

شام نے ایک بار پھر شہریوں کو نشانہ بنانے والے ہر حملے کو قطعی طور پر مسترد کرتے ہوئے مطالبہ کیا ہے کہ ایسے اقدامات جو خطے کے امن و استحکام کے لیے خطرہ ہیں، فوری طور پر روکے جائیں۔