سعودی عرب کے کئی علاقوں میں آج بارش اور گرمی کی شدت

محکمہ موسمیات نے پیر کو جاری اپنی رپورٹ میں پیش گوئی کی ہے کہ جازان، عسیر، الباحہ اور مکہ مکرمہ کے جنوبی پہاڑی علاقوں میں گرج چمک کے ساتھ بارش، ژالہ باری اور تیز ہوائیں چلنے کا امکان ہے۔

رپورٹ میں مزید بتایا گیا ہے کہ مشرقی ریجن سمیت ریاض اور قصیم کے کچھ حصوں میں موسم گرم سے شدید گرم رہے گا۔ ان علاقوں کے علاوہ شمالی سرحدی علاقہ، الجوف، تبوک، مدینہ منورہ اور نجران کے کچھ حصوں میں بھی گرد آلود تیز ہواؤں کا سلسلہ جاری رہے گا، جس سے مکہ مکرمہ کے بعض ساحلی علاقوں میں حد نگاہ انتہائی کم ہو سکتی ہے۔

بحر احمر اور خلیج عرب کی صورتحال

محکمہ موسمیات کے مطابق بحر احمر کے شمالی اور وسطی حصوں میں سطحی ہوائیں شمال مغرب سے مغرب کی سمت 15 سے 35 کلومیٹر فی گھنٹہ کی رفتار سے چلیں گی، جبکہ وسطی حصے میں یہ رفتار 45 کلومیٹر فی گھنٹہ تک پہنچ سکتی ہے۔ جنوبی حصے میں ہوائیں جنوب مغرب سے شمال مغرب کی سمت 15 سے 40 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 55 کلومیٹر فی گھنٹہ تک جا سکتی ہیں۔

بحر احمر میں لہریں آدھے میٹر سے ڈیڑھ میٹر تک بلند ہوں گی، جبکہ وسطی حصے میں گرج چمک کے ساتھ بارش کے دوران یہ دو میٹر سے بھی زیادہ ہو سکتی ہیں۔ مجموعی طور پر سمندر کی حالت ہلکی سے درمیانی اور بعض اوقات وسطی حصے میں تیز لہروں والی رہے گی۔

خلیج عرب میں شمال مشرق سے شمال مغرب کی سمت ہوائیں شمالی حصے میں 15 سے 34 کلومیٹر فی گھنٹہ اور وسطی و جنوبی حصوں میں جنوب مشرق سے شمال مشرق کی سمت 10 سے 23 کلومیٹر فی گھنٹہ کی رفتار سے چلیں گی۔ یہاں لہریں آدھے میٹر سے ایک میٹر تک بلند ہوں گی اور سمندر کی حالت ہلکی لہروں والی رہے گی۔