عنیزہ اور ریاض الخبراء صحت مند شہروں کی فہرست میں شامل

سعودی عرب نے معیارِ زندگی اور صحت عامہ کے فروغ میں ایک اور سنگ میل عبور کرلیا ہے، جہاں صحت مند شہروں کی تعداد بڑھ کر 21 ہوگئی ہے۔ اس پیش رفت سے مختلف شعبوں کے درمیان قومی سطح پر ہم آہنگی اور سعودی عرب کی علاقائی سطح پر صحت مند شہروں کے معیار کے نفاذ میں مضبوط موجودگی ظاہر ہوتی ہے۔

امارتِ قصیم نے بتایا کہ عنیزہ اور ریاض الخبراء کو بھی مملکت کے صحت مند شہروں میں شامل کرلیا گیا ہے۔ اس کامیابی کا سہرا مختلف شعبوں اور قومی کوششوں کو جاتا ہے جو معاشرتی صحت اور معیارِ زندگی کو بہتر بنانے کے لیے کی جارہی ہیں۔

وزارت صحت کے مطابق، آج منگل کو ہونے والے کابینہ اجلاس میں خادم الحرمین الشریفین کی حکومت کے علاقائی اور عالمی اداروں میں فعال کردار اور 21 شہروں کو عالمی ادارہ صحت سے صحت مند شہر کا درجہ دلانے کی کوششوں کو سراہا گیا۔

صحت مند شہروں کا تصور صحت کے معیارات کو ادارہ جاتی اور ترقیاتی عمل میں ڈھالنے پر مبنی ہے، جس میں انسان اور اس کی زندگی کو اولین ترجیح دی جاتی ہے اور صحت افزا ماحول فراہم کیا جاتا ہے، جو پائیدار ترقی اور معیارِ زندگی کے پروگراموں کے اہداف سے ہم آہنگ ہے۔

مملکت میں صحت مند شہروں کی تعداد میں اضافہ اس بات کا عکاس ہے کہ مختلف علاقوں میں صحت عامہ کے فروغ، حکومتی اداروں اور معاشرے کے درمیان شراکت داری اور شہروں کی ترقی کے لیے مسلسل کوششیں جاری ہیں، تاکہ شہریوں کے لیے صحت مند اور پائیدار ماحول یقینی بنایا جا سکے۔