خلیجی گاڑیوں کے مالکان کے لیے 90 روزہ اصلاحی مہلت

ہیئت زکوة و ٹیکس و کسٹمز نے وزارت داخلہ اور محکمہ ٹریفک کے تعاون سے سعودی شہریوں اور غیر خلیجی مقیمین، جو خلیجی گاڑیوں کے مالک یا ان کے ڈرائیور ہیں، سے کہا ہے کہ وہ 90 روزہ اصلاحی مہلت سے فائدہ اٹھا کر اپنی گاڑیوں کی قانونی حیثیت درست کریں۔

یہ اصلاحی مہلت 26 اگست 2026 سے شروع ہو کر 23 نومبر 2026 کے اختتام تک جاری رہے گی۔ یہ سہولت ان خلیجی گاڑیوں کے لیے ہے جو ضوابط کے نفاذ سے قبل سعودی عرب میں موجود ہیں۔

ہیئت نے واضح کیا کہ گاڑی کی قانونی حیثیت درست کرنے کے لیے یا تو گاڑی کو مہلت ختم ہونے سے پہلے سعودی عرب سے باہر نکالا جا سکتا ہے، یا پھر اسے کسٹمز کے ذریعے رجسٹر کروا کر سعودی نمبر پلیٹ حاصل کی جا سکتی ہے، اس کے لیے مقررہ قانونی طریقہ کار اختیار کرنا ہوگا۔

ضوابط کے نفاذ کے ساتھ ہی ہیئت نے بتایا کہ سعودی شہری یا غیر خلیجی مقیمین کی ملکیت یا اجازت سے چلنے والی خلیجی گاڑی 365 دن میں زیادہ سے زیادہ 90 دن (مسلسل یا وقفے وقفے سے) سعودی عرب میں رہ سکتی ہے۔

یہ مدت گاڑی کے کسٹمز پوائنٹ سے سعودی عرب میں داخلے کے دن سے شمار ہوگی۔

اعرض التغريدة على منصة X

ہیئت نے مزید بتایا کہ گاڑی کی رجسٹریشن کے لیے کسٹمز ایجنٹ کے ذریعے قریبی کسٹمز پوائنٹ پر بیان جمع کروایا جا سکتا ہے، اس کے لیے تمام مطلوبہ دستاویزات اور فیس ادا کرنا ہوں گی، اور گاڑی کو دوبارہ داخلے کے پوائنٹ پر لے جانے کی ضرورت نہیں ہوگی۔

گاڑی مالکان ہیئت کی ویب سائٹ پر دستیاب کسٹمز ایجنٹس کی فہرست سے ایجنٹ منتخب کر سکتے ہیں۔

ضوابط کے مطابق، مقررہ مدت ختم ہونے سے قبل گاڑی کی مدت قیام میں 30 دن تک کی توسیع کی درخواست دی جا سکتی ہے، یہ درخواست محکمہ ٹریفک کے ساتھ رابطے اور ابشر پلیٹ فارم کے ذریعے دی جا سکے گی۔

ہیئت نے خلیجی گاڑیوں کے مالکان اور ڈرائیوروں کو ہدایت کی ہے کہ وہ سعودی عرب میں خلیجی گاڑیوں کے قیام کے ضوابط ہیئت کی ویب سائٹ پر ملاحظہ کریں اور اصلاحی مہلت سے فائدہ اٹھائیں۔