سعودی عرب کے کئی علاقوں میں آج بارش اور تیز ہوائیں متوقع

محکمہ موسمیات نے اپنی روزانہ رپورٹ میں بتایا ہے کہ آج جازان، عسیر، الباحہ، مکہ مکرمہ کے کچھ حصوں میں درمیانے سے شدید درجے کی گرج چمک کے ساتھ بارشیں متوقع ہیں، جن کے باعث سیلابی کیفیت پیدا ہو سکتی ہے۔ اس کے علاوہ ژالہ باری اور گرد و غبار کے ساتھ تیز ہوائیں بھی چلیں گی۔ یہ سلسلہ مدینہ منورہ، حائل، تبوک، الجوف، شمالی حدود اور مشرقی ریجن کے شمالی حصوں تک پھیل سکتا ہے۔

رپورٹ میں مزید کہا گیا ہے کہ ان علاقوں اور مشرقی ریجن کے کچھ حصوں میں دھند چھانے کا امکان بھی ہے۔

بحیرہ احمر کی صورتحال کے حوالے سے رپورٹ میں بتایا گیا ہے کہ شمالی حصے میں سطحی ہوائیں شمال مغرب سے شمال کی سمت 15 سے 38 کلومیٹر فی گھنٹہ کی رفتار سے چلیں گی، درمیانی حصے میں شمال مغرب سے شمال مشرق کی سمت 10 سے 32 کلومیٹر فی گھنٹہ جبکہ جنوبی حصے میں جنوب سے جنوب مشرق کی سمت 20 سے 45 کلومیٹر فی گھنٹہ کی رفتار سے چلیں گی۔ شمال اور وسط میں موجوں کی اونچائی آدھے میٹر سے ڈیڑھ میٹر جبکہ جنوب میں ایک میٹر سے دو میٹر تک رہے گی۔ شمال اور وسط میں سمندر کی کیفیت ہلکی سے درمیانی اور جنوب میں درمیانی رہے گی۔

خلیج عرب میں شمالی حصے میں سطحی ہوائیں شمال مغرب سے شمال کی سمت 10 سے 35 کلومیٹر فی گھنٹہ جبکہ جنوبی حصے میں شمال مشرق سے شمال مغرب کی سمت 10 سے 35 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 50 کلومیٹر فی گھنٹہ تک پہنچ سکتی ہیں۔ شمال میں موجوں کی اونچائی آدھے میٹر سے ڈیڑھ میٹر اور جنوب میں بارش کے ساتھ دو میٹر سے زائد ہو سکتی ہے۔ شمال اور جنوب میں سمندر کی کیفیت ہلکی سے درمیانی اور بارش کے دوران جنوب میں موجیں بلند ہو سکتی ہیں۔