رابطہ عالم اسلامی کی حوثیوں کی جانب سے مکہ اور شہری علاقوں کو نشانہ بنانے کی مذمت

رابطہ عالم اسلامی نے حوثی دہشت گرد ملیشیا کی جانب سے مکہ مکرمہ اور سعودی عرب کے شہری علاقوں کو میزائلوں اور ڈرونز کے ذریعے نشانہ بنانے کی مسلسل کوششوں کی شدید مذمت کی ہے۔

رابطہ نے اس بات کی نشاندہی کی کہ سعودی فضائی دفاع نے ان تمام حملوں کو ناکام بنا دیا ہے۔

رابطہ کے سیکریٹری جنرل اور مجلس علماء مسلمین کے سربراہ، شیخ ڈاکٹر محمد بن عبد الکریم العیسیٰ نے سیکریٹریٹ کے جاری کردہ بیان میں کہا کہ ملیشیا کے یہ دانستہ حملے مقدسات کی حرمت پامال کرتے ہیں اور شہریوں کی جانوں کو خطرے میں ڈالتے ہیں۔

انہوں نے کہا کہ یہ حملے دنیا بھر کے دو ارب سے زائد مسلمانوں کے جذبات کو مجروح کرتے ہیں اور اسلامی تعلیمات و انسانی اصولوں کی کھلی خلاف ورزی ہیں۔

انہوں نے رابطہ کے تمام عالمی اداروں، کونسلوں اور اس کے زیر سایہ اسلامی اقوام کی جانب سے اس بات کا اعادہ کیا کہ وہ مقدسات کے تحفظ، شہریوں کی سلامتی اور حملہ آوروں کی روک تھام کے لیے سعودی عرب کے تمام اقدامات کی مکمل حمایت کرتے ہیں۔