سعودی عرب کے کئی علاقوں میں موسلا دھار بارش اور سیلاب کا امکان

محکمہ موسمیات نے اپنی روزانہ کی رپورٹ میں کہا ہے کہ آج جازان، عسیر، الباحہ، مکہ مکرمہ اور مدینہ منورہ کے بعض حصوں میں درمیانے سے شدید درجے کی گرج چمک کے ساتھ بارش متوقع ہے، جو سیلابی ریلوں کا سبب بن سکتی ہے۔ ان بارشوں کے ساتھ ژالہ باری اور تیز ہوائیں بھی چلیں گی۔

رپورٹ میں مزید بتایا گیا ہے کہ مذکورہ علاقوں اور مشرقی ریجن کے ساحلی حصوں میں دھند بننے کا امکان بھی ہے۔

اسی حوالے سے محکمہ موسمیات نے کہا کہ نجران اور مشرقی ریجن کے جنوبی حصوں میں بھی گرد آلود تیز ہواؤں کے ساتھ گرج چمک والے بادل بننے کا امکان رد نہیں کیا جا سکتا۔

سمندر اور ہواؤں کی کیفیت

رپورٹ کے مطابق بحیرہ احمر میں سطحی ہوائیں شمالی سے شمال مغربی سمت میں 15 سے 38 کلومیٹر فی گھنٹہ کی رفتار سے چلیں گی، جبکہ موجوں کی اونچائی آدھے میٹر سے ڈیڑھ میٹر تک رہے گی اور سمندر کی حالت ہلکی سے درمیانی ہوگی۔

خلیج عرب میں سطحی ہوائیں جنوب مغربی سے جنوب مشرقی سمت میں 10 سے 25 کلومیٹر فی گھنٹہ کی رفتار سے چلیں گی، موجوں کی اونچائی آدھے میٹر سے ایک میٹر تک ہوگی اور سمندر کی کیفیت ہلکی رہے گی۔