ینبع میں آبپاشی نظام اور شجرکاری کے تحفظ کیلئے آگاہی مہم

پانی کے استعمال میں بچت اور سبزہ زاروں کے تحفظ کی اہمیت اجاگر کرنے کے لیے شاہی کمیشن ینبع نے آبپاشی نظام اور شجرکاری کے تحفظ کے حوالے سے آگاہی مہم کا آغاز کیا ہے۔

کمیشن نے اپنے سرکاری ایکس اکاؤنٹ پر جاری بیان میں بتایا کہ آبپاشی کے خودکار نظام رات کے اوقات میں نہایت درستگی کے ساتھ پودوں اور درختوں تک مخصوص مقدار میں پانی پہنچاتے ہیں۔ بیان میں کہا گیا کہ آبپاشی کے فواروں یا سپرنکلرز کے ساتھ غیر مجاز چھیڑ چھاڑ سے نظام میں پانی کے دباؤ میں خلل، پانی کے اخراج اور ضیاع کے ساتھ ساتھ شجرکاری کے دیگر حصوں تک پانی کی فراہمی میں کمی واقع ہو سکتی ہے۔

کمیشن کے مطابق اس طرح کی مداخلت کے اثرات ایک مکمل آبپاشی سائیکل یا کئی دنوں تک برقرار رہ سکتے ہیں، جس سے پودے سوکھ سکتے ہیں اور شجرکاری کے بعض حصے ضائع ہو سکتے ہیں، جو صنعتی شہر ینبع کے ماحول اور شہری منظر پر منفی اثر ڈالتے ہیں۔

کمیشن نے زور دیا کہ آبپاشی نظام اور اس کے اجزا کا تحفظ سب کی مشترکہ ذمہ داری ہے۔ شہریوں سے اپیل کی گئی ہے کہ وہ اس نظام کے تحفظ میں تعاون کریں اور کسی بھی خرابی یا مسئلے کی اطلاع دیں، تاکہ آبی وسائل کے پائیدار استعمال، پانی کے ضیاع میں کمی اور شہر کی سبزہ زاری برقرار رکھی جا سکے۔

اعرض التغريدة على منصة X