خمیس مشیط اور ابہا میں خطرہ ٹل گیا، سول ڈیفنس کا اعلان
سعودی سول ڈیفنس نے خمیس مشیط اور ابہا میں خطرے کے خاتمے کا اعلان کیا ہے۔ اس سے قبل ایمرجنسی الرٹ جاری کیا گیا تھا۔
اہم نکات
AIسعودی محکمہ سول ڈیفنس نے خمیس مشیط اور ابہا میں خطرے کے خاتمے کا اعلان کیا ہے۔ اس سے قبل ابہا شہر میں ایمرجنسی کی صورت میں قومی ابتدائی انتباہی پلیٹ فارم سے خطرے کی وارننگ جاری کی گئی تھی۔
محکمہ نے وارننگ کے ساتھ جاری کردہ ہدایات میں شہریوں کو پُر سکون رہنے، سرکاری ہدایات پر عمل کرنے اور فوری طور پر کسی قریبی محفوظ جگہ یا عمارت کے اندرونی کمرے میں منتقل ہونے کی تلقین کی تھی، اور کہا تھا کہ خطرہ ختم ہونے تک وہیں رہیں۔
مزید کہا گیا تھا کہ خطرے کے خاتمے تک گھر یا عمارت سے باہر نہ نکلیں، کھلی جگہوں اور شیشے سے دور رہیں اور بالکونی یا چھت پر ہرگز نہ جائیں۔
محکمہ نے واضح کیا کہ اگر کوئی شخص گھر سے باہر ہو تو قریبی عمارت میں داخل ہو جائے یا کسی مضبوط دیوار کے پیچھے پناہ لے، اور ہر صورت ہجوم اور ویڈیو بنانے سے گریز کرے اور خطرناک مقامات سے دور رہے۔
محکمہ نے ہدایت کی کہ وارننگ موصول ہونے پر اگر آپ گاڑی میں ہیں تو سڑک کے کنارے رک جائیں، لیکن پلوں اور بلند عمارتوں سے دور رہیں۔ مکہ مکرمہ، مدینہ منورہ، ریاض اور مشرقی ریجن میں ایمرجنسی کے لیے 911 اور باقی علاقوں میں 998 پر رابطہ کریں۔
محکمہ نے اس بات پر زور دیا کہ متعلقہ اداروں کی جانب سے جاری کردہ ہدایات صرف سرکاری ذرائع سے ہی حاصل کی جائیں۔