سعودی عرب میں اقامہ و سرحدی قوانین کی خلاف ورزی پر 13 ہزار سے زائد افراد گرفتار

سعودی عرب کے تمام علاقوں میں اقامہ، محنت اور سرحدی قوانین کی خلاف ورزی کرنے والوں کے تعاقب اور گرفتاری کے لیے مشترکہ مہمات 4 جمادی الاول 1448ھ (15 اکتوبر 2026) سے 10 جمادی الاول 1448ھ (21 اکتوبر 2026) تک جاری رہیں، جن کے دوران درج ذیل نتائج سامنے آئے:

اول: ملک بھر میں سکیورٹی اداروں کی مشترکہ مہمات کے دوران مجموعی طور پر 13 ہزار 905 افراد کو گرفتار کیا گیا، جن میں 6 ہزار 554 اقامہ قوانین، 3 ہزار 865 سرحدی قوانین اور 3 ہزار 486 محنت قوانین کے خلاف ورزی کرنے والے شامل ہیں۔

دوم: سرحد عبور کر کے غیر قانونی طور پر مملکت میں داخل ہونے کی کوشش کرنے والے 1 ہزار 881 افراد کو گرفتار کیا گیا، جبکہ 22 افراد کو غیر قانونی طور پر ملک سے باہر جانے کی کوشش پر پکڑا گیا۔

سوم: اقامہ، محنت اور سرحدی قوانین کے خلاف ورزی کرنے والوں کو نقل و حمل، پناہ دینے یا ملازمت فراہم کرنے اور ان کی پردہ پوشی میں ملوث 21 افراد کو بھی گرفتار کیا گیا۔

چہارم: اس وقت 37 ہزار 618 غیر ملکی خلاف ورزی کرنے والوں کو قانونی کارروائی کے مراحل سے گزارا جا رہا ہے، جن میں 35 ہزار 449 مرد اور 2 ہزار 169 خواتین شامل ہیں۔

پنجم: 20 ہزار 252 خلاف ورزی کرنے والوں کو سفری دستاویزات کے حصول کے لیے ان کے سفارتی مشنز کے حوالے کیا گیا، 6 ہزار 555 افراد کو سفری بکنگ مکمل کرنے کے لیے بھیجا گیا، جبکہ 7 ہزار 934 افراد کو ملک بدر کر دیا گیا۔

وزارت داخلہ نے خبردار کیا ہے کہ جو بھی شخص سرحدی قوانین کے خلاف ورزی کرنے والوں کو مملکت میں داخل ہونے میں مدد دے، انہیں ملک کے اندر منتقل کرے، پناہ فراہم کرے یا کسی بھی طرح کی مدد یا سہولت دے، وہ 15 سال تک قید، ایک ملین سعودی ریال تک جرمانہ اور نقل و حمل یا رہائش کی ضبطی سمیت تشہیر کی سزا کا مستحق ہوگا۔

وزارت نے واضح کیا کہ یہ جرم سنگین اور قابل گرفتاری ہے، جو دیانت اور امانت کے منافی ہے۔ شہریوں سے اپیل کی گئی ہے کہ کسی بھی خلاف ورزی کی صورت میں مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 یا 996 پر اطلاع دیں۔