سعودی کسٹمز نے ایک ہفتے میں 1119 ممنوعہ اشیا ضبط کیں

سعودی عرب کے زمینی، بحری اور فضائی کسٹمز نے اعلان کیا ہے کہ ایک ہفتے کے دوران 1119 ممنوعہ اشیا ضبط کی گئی ہیں۔ یہ اقدامات زکوة، ٹیکس اور کسٹمز اتھارٹی (زاتکا) کی جانب سے سیکیورٹی کو مضبوط بنانے اور معاشرے کو مختلف اقسام کی ممنوعہ اشیا سے محفوظ رکھنے کے لیے کیے گئے ہیں۔

ضبط شدہ اشیا میں 58 اقسام کی منشیات شامل ہیں، جن میں حشیش، کوکین، ہیروئن، شبو، کیپٹاگون گولیاں اور دیگر منشیات شامل ہیں۔ اس کے علاوہ 212 اقسام کی دیگر ممنوعہ اشیا بھی پکڑی گئی ہیں۔

کسٹمز حکام نے 850 بار تمباکو اور اس کی مصنوعات کی اسمگلنگ ناکام بنائی، جبکہ 14 اقسام میں مالی رقوم اور 3 اقسام میں اسلحہ اور اس سے متعلقہ سامان بھی ضبط کیا گیا۔

زاتکا نے اس عزم کا اظہار کیا ہے کہ وہ مملکت کی درآمدات اور برآمدات پر کسٹمز نگرانی کو مزید سخت کرے گی تاکہ معاشرتی تحفظ کو یقینی بنایا جا سکے۔ اس مقصد کے لیے متعلقہ اداروں کے ساتھ تعاون اور رابطہ جاری رکھا جائے گا۔

زاتکا نے عوام سے اپیل کی ہے کہ وہ اسمگلنگ کی روک تھام اور قومی معیشت کے تحفظ کے لیے تعاون کریں۔ اس حوالے سے معلومات فراہم کرنے کے لیے مخصوص ہیلپ لائن (1910)، ای میل ([email protected]) یا بین الاقوامی نمبر (009661910) پر رابطہ کیا جا سکتا ہے۔ اتھارٹی ان ذرائع سے موصول ہونے والی اطلاعات کو مکمل رازداری کے ساتھ وصول کرتی ہے اور درست اطلاع دینے والے کو مالی انعام بھی دیا جاتا ہے۔