حوثی دہشت گردی کا خاتمہ عالمی ذمہ داری ہے: شہزادی ریما بنت بندر

سعودی عرب کی امریکہ میں سفیر شہزادی ریما بنت بندر بن سلطان نے عالمی برادری سے مطالبہ کیا ہے کہ وہ حوثی ملیشیا کو ایک مسلح دہشت گرد قوت کے طور پر ختم کرنے کا واضح ہدف مقرر کرے۔ انہوں نے کہا کہ آج حوثی وہی ہیں جو داعش موصل پر قبضے اور خلافت کے اعلان سے قبل تھی، یعنی ایک ایسی دہشت گرد تحریک جسے دنیا نے نظرانداز کیا۔

شہزادی ریما نے یہ بات اپنے ایک مضمون میں کہی جو آج امریکی اخبار 'نیویارک ٹائمز' میں شائع ہوا۔ انہوں نے کہا کہ اس کا مطلب ہے کہ حوثیوں کو ہر دارالحکومت میں دہشت گرد گروہ قرار دیا جائے، ان کی مالی معاونت روکی جائے، سمندری راستے سے اسلحے کی فراہمی بند کی جائے اور یمنی حکومت کو اس کے مقاصد کے حصول کے لیے درکار وسائل فراہم کیے جائیں۔

انہوں نے اپنے مضمون کی ابتدا ابتهال بنت عبداللہ کی کہانی سے کی، جو 'طیران ریاض' میں مسافروں کی خدمات انجام دیتی ہیں۔ انہوں نے 10 اکتوبر کو حوثی ملیشیا کی جانب سے ریاض کے کنگ خالد انٹرنیشنل ایئرپورٹ پر حملے کے بعد ایک بزرگ مسافر کے زخم کو سر پر بندھی چادر سے باندھا، ایمرجنسی دروازے کھولے اور مسافروں کو باہر نکالا۔ بعد ازاں زخمی ہونے کے باوجود وہ دوبارہ اندر گئیں اور امدادی اہلکاروں کو زخمیوں تک پہنچنے میں مدد دی۔

شہزادی ریما نے کہا: "حوثیوں نے خوف پھیلانے کے لیے میزائل داغا، جبکہ ابتهال نے اس کا جواب بہادری سے دیا۔" انہوں نے مزید کہا کہ سعودی عرب میں اب نوجوان خواتین اپنے ملک کا مستقبل سنوار رہی ہیں اور انہیں یہ سب دہشت گردی کے سائے میں نہیں کرنا چاہیے۔

انہوں نے مسافروں سے بھری ایک ہال پر حملے کو "سراسر اور واضح دہشت گردی قرار دیا، جس کا مقابلہ اسی عالمی عزم سے ہونا چاہیے جس نے ماضی میں دہشت گرد تنظیموں کو شکست دی۔

شہزادی ریما نے نشاندہی کی کہ حوثی ملیشیا کے رہنما عبدالملک الحوثی نے ایرانی حمایت سے دو دہائیوں میں دہشت گرد نیٹ ورک بنایا، ہر امن معاہدے کی خلاف ورزی کی اور ہر جنگ بندی کو دوبارہ اسلحہ جمع کرنے کے لیے استعمال کیا۔ ان کا نعرہ "امریکہ مردہ باد" ہے اور ریاض ایئرپورٹ حملے میں ایک امریکی بھی ہلاک ہوا۔

انہوں نے داعش کی جانب سے 2014 میں رقہ میں ایک اسکارڈ میزائل کی نمائش کا عالمی سرخیوں میں آنے کا حوالہ دیا اور کہا کہ اس کے مقابلے میں حوثیوں نے مارچ 2016 سے اب تک سعودی عرب پر ایک ہزار سے زائد بیلسٹک میزائل اور ڈرون حملے کیے ہیں۔ انہوں نے اقوام متحدہ کے محققین کی رپورٹ کا حوالہ دیا جس کے مطابق حوثی مشرقی افریقہ میں الشباب کو دھماکہ خیز مواد اور ڈرون بنانے کی تربیت دیتے ہیں۔ ایک امریکی کمپنی نے گزشتہ ماہ انکشاف کیا کہ شمالی یمن میں اسلحہ ساز گروہ نے طویل فاصلے تک مار کرنے والے میزائل کی رہنمائی کے لیے اس کے ٹولز استعمال کرنے کی کوشش کی۔

شہزادی ریما نے خبردار کیا کہ یہ خطرہ یمن سے آگے بڑھ چکا ہے۔ حوثیوں نے باب المندب آبنائے کو بند کرنے کی دھمکی دی ہے، جہاں سے دنیا کی تقریباً 10 فیصد تجارت گزرتی ہے۔ اس ماہ سعودی توانائی تنصیبات پر حملوں کے باعث تیل کی قیمتیں 100 ڈالر فی بیرل سے تجاوز کر گئیں۔

انہوں نے کہا کہ جس طرح داعش کو مقامی فورسز اور 80 سے زائد ملکوں کے اتحاد نے شکست دی، اسی طرح حوثیوں کو بھی شکست دینا ممکن ہے۔ یہ یمن کی جنگ ہے اور سعودی عرب 2015 سے یمنی حکومت کی درخواست پر اس کے ساتھ کھڑا ہے اور اب بھی اس کا سب سے بڑا انسانی امدادی عطیہ دہندہ ہے۔

شہزادی ریما نے بتایا کہ یمنی سرکاری فورسز اس وقت مغربی ساحل، الجوف اور مارب میں سعودی فضائی مدد سے کارروائیاں کر رہی ہیں اور اب تک حوثیوں کو بھیجے جانے والے 750 ٹن سے زائد اسلحہ ضبط کیا جا چکا ہے۔ اتحاد حوثیوں کے میزائل لانچنگ مقامات اور اسلحہ گوداموں کو نشانہ بنا رہا ہے تاکہ حملوں کے نیٹ ورک کو توڑا جا سکے۔

انہوں نے مزید کہا کہ سعودی عرب نے اپنے مالیاتی نظام کو حوثیوں اور دیگر دہشت گرد گروہوں کے لیے بند کر دیا ہے اور اپنے شراکت داروں کے ساتھ مل کر پابندیوں اور دہشت گرد قرار دینے کے اقدامات پر عمل کر رہا ہے۔ انہوں نے امریکہ کی جانب سے حوثیوں کو غیر ملکی دہشت گرد تنظیم قرار دینے کے فیصلے کو سراہا اور تمام ممالک سے ایسا ہی کرنے کی اپیل کی۔

آخر میں شہزادی ریما نے کہا کہ حوثیوں کی مسلح دہشت گردی کا خاتمہ ہی یمنی قیادت میں سیاسی حل کی واحد راہ ہے، جس کی سعودی عرب ہمیشہ حمایت کرتا آیا ہے۔ انہوں نے کہا: "ابتهال نے حوثیوں کی دہشت گردی کا بہادری سے مقابلہ کیا، یمنی عوام روزانہ اس کا سامنا کرتے ہیں اور ہم ان کے ایک پرامن مستقبل کے مقروض ہیں۔"