خمیس مشیط سے خطرہ ٹل گیا، شہری دفاع کا اعلان

سعودی شہری دفاع نے آج اتوار کو خمیس مشیط سے خطرہ ٹل جانے کا اعلان کیا ہے۔ اس موقع پر شہریوں اور مقیمین کو ہدایت کی گئی ہے کہ وہ متعلقہ اداروں کی جانب سے جاری کردہ ہدایات اور رہنمائی پر عمل جاری رکھیں، اور کسی بھی صورت میں ہجوم یا تصویربرداری سے مکمل طور پر گریز کریں۔

شہری دفاع نے عوامی سلامتی کے تحفظ کے لیے سرکاری ہدایات پر عمل کرنے کی اہمیت پر زور دیا اور ہنگامی صورت میں (911) پر رابطہ کرنے کی ہدایت کی۔

اس سے قبل شہری دفاع نے شہریوں اور مقیمین کو پُر سکون رہنے، قریبی محفوظ مقام پر منتقل ہونے، کھڑکیوں، شیشوں اور کھلی جگہوں سے دور رہنے، اور خطرہ ختم ہونے تک عمارتوں سے باہر نہ نکلنے یا بالکونی اور چھت پر نہ جانے کی ہدایت کی تھی۔

ہدایات میں یہ بھی کہا گیا تھا کہ اگر آپ باہر موجود ہوں تو فوراً قریبی عمارت میں پناہ لیں اور خطرناک مقامات سے دور رہیں، جبکہ ڈرائیورز کو متنبہ کیا گیا کہ اگر دورانِ سفر انتباہ ملے تو وہ گاڑی کو محفوظ جگہ پر روکیں، پلوں اور بلند عمارتوں سے دور رہیں۔