سعودی عرب، پاکستان اور ترکی کی خارجہ پالیسی توسیعی نہیں: ہاکان فیدان

ترکی کے وزیر خارجہ ہاکان فیدان نے کہا ہے کہ سعودی عرب، پاکستان اور ترکی کی خارجہ پالیسی توسیعی نہیں ہے۔

وزیر خارجہ نے مزید کہا کہ جب ہم متحد ہوتے ہیں تو ایک دفاعی اتحاد تشکیل دیتے ہیں، یعنی ہم کسی جارحانہ حکمت عملی کے قائل نہیں۔ انہوں نے کہا کہ جب تک اس اتحاد پر حملہ نہ ہو، اس کا کسی بھی ملک سے کوئی اختلاف نہیں ہوگا۔

ہاکان فیدان نے واضح کیا کہ یہ تینوں ممالک اپنے اپنے ماحول اور سرحدوں کے اندر مثبت کردار ادا کرنے کی کوشش کرتے ہیں، ان کے اپنے معاملات اور مختلف طریقہ کار و صلاحیتیں ہیں، بس یہی حقیقت ہے۔

ترک وزیر خارجہ نے مزید کہا کہ جب ہم ان دونوں ممالک کے ساتھ ملتے ہیں تو ایک دفاعی تنظیم کی شکل اختیار کر لیتے ہیں، ہمارا کوئی جارحانہ رویہ نہیں ہوتا، اس لیے جب تک اندرون یا بیرون خطہ سے کوئی حملہ نہ ہو، کوئی اختلاف نہیں ہوگا۔