سعودی عرب کی مسجد اقصیٰ پر اسرائیلی اقدامات کی شدید مذمت

سعودی وزارت خارجہ نے مسجد اقصیٰ کے خلاف اسرائیلی حکام اور شدت پسند آبادکاروں کی اشتعال انگیز کارروائیوں کی شدید مذمت اور ان پر سخت احتجاج کیا ہے۔ وزارت نے کہا کہ ان اقدامات سے مسجد اقصیٰ کی حرمت اور اس کے مذہبی و تاریخی مقام کو نشانہ بنایا جا رہا ہے، اور یہ سب کچھ اسرائیلی فورسز کی سرپرستی میں ہو رہا ہے۔ سعودی عرب نے بین الاقوامی قوانین کی ان خلاف ورزیوں کو مسترد کرتے ہوئے کہا کہ یہ اقدامات دنیا بھر کے مسلمانوں کے جذبات کو مجروح کرتے ہیں۔
وزارت نے اپنے بیان میں کہا: "سعودی عرب اسرائیلی حکام کی جانب سے جنوبی لبنان اور غزہ کے 'یلو لائن' تک کے علاقوں کو ضم کرنے کے بیانات کی بھی مذمت کرتا ہے اور کسی بھی اسرائیلی توسیع پسندانہ کوشش کو مسترد کرتا ہے۔ سعودی عرب ایک بار پھر فلسطینی عوام کے حق خود ارادیت اور 1967ء کی سرحدوں کے مطابق مشرقی یروشلم کو دارالحکومت بنا کر آزاد ریاست کے قیام کی حمایت کا اعادہ کرتا ہے۔"