عالمی ادارہ صحت کی سربراہی کیلئے سعودی امیدوار بھی دوڑ میں

عالمی ادارہ صحت کے ڈائریکٹر جنرل کے عہدے کے لیے نامزدگیوں کا عمل مکمل ہوگیا ہے اور تنظیم کی ویب سائٹ کے مطابق پانچ ممالک کے پانچ امیدوار اس منصب کے لیے میدان میں ہیں۔ یہ امیدوار ایتھوپیا کے تیدروس ادھانوم گیبریسس کی جگہ لینے کے خواہشمند ہیں، جو 2017 سے ادارے کی قیادت کر رہے ہیں۔

امیدواروں میں قطر کی سابق وزیر صحت حنان محمد الکواری، سعودی عرب سے حنان بلخی جو مشرقی بحر روم کے لیے ادارہ صحت کے دفتر کی سربراہ ہیں، بیلجیئم سے ہانز کلوجے جو یورپ کے لیے ادارہ صحت کے علاقائی ڈائریکٹر ہیں، اسپین سے وبائی امراض کی ماہر اور ادارے کی سابق ڈائریکٹر ماریا نیرا، اور انڈونیشیا کے وزیر صحت بادی گنادی سادیقین شامل ہیں۔

امیدواروں کے لیے فورم آئندہ نومبر میں منعقد ہوگا، جبکہ ادارے کی ایگزیکٹو کونسل جنوری 2027 میں تین امیدواروں پر مشتمل مختصر فہرست تیار کرے گی۔

یاد رہے کہ تیدروس کے دور میں کووڈ-19 کی عالمی وبا، ایبولا اور منکی پاکس جیسی وبائیں سامنے آئیں۔ ان کی مدت کے دوران واشنگٹن، جو ادارے کا سب سے بڑا مالی معاون ہے، نے 2025 میں تنظیم سے علیحدگی کا ارادہ ظاہر کیا تھا، جب سابق صدر ڈونلڈ ٹرمپ نے ادارے پر کورونا بحران کی ناقص انتظام کاری کا الزام لگایا تھا، جسے ادارہ صحت نے مسترد کیا۔