سعودی عرب میں آج گرج چمک کے ساتھ بارش اور تیز ہوائیں متوقع

محکمہ موسمیات نے آج کے موسم کی رپورٹ میں پیش گوئی کی ہے کہ جازان اور عسیر کے بعض حصوں میں درمیانے سے شدید درجے کی گرج چمک کے ساتھ بارش، ژالہ باری اور تیز ہوائیں متوقع ہیں۔ الباحہ اور مکہ مکرمہ کے پہاڑی علاقوں میں ہلکی سے درمیانے درجے کی بارش کا امکان ہے۔ مشرقی ریجن اور ریاض کے کچھ حصوں میں موسم گرم سے شدید گرم رہے گا، جبکہ ان علاقوں کے جنوبی حصوں اور نجران میں بھی گرج چمک کے ساتھ بارش اور تیز ہوائیں خارج از امکان نہیں۔ مکہ مکرمہ اور مدینہ منورہ کے کچھ حصوں سمیت حائل تک تیز ہوائیں اور گرد و غبار اٹھنے کا امکان ہے۔

رپورٹ کے مطابق بحیرہ احمر میں سطحی ہوائیں شمال مغرب سے مغرب کی سمت 15 سے 40 کلومیٹر فی گھنٹہ کی رفتار سے چلیں گی، جو جنوبی حصے میں گرج چمک کے ساتھ بارش کے دوران 50 کلومیٹر فی گھنٹہ سے بھی تجاوز کر سکتی ہیں۔ اس دوران موجوں کی اونچائی نصف میٹر سے ڈیڑھ میٹر تک اور بارش کے وقت دو میٹر سے بھی زیادہ ہو سکتی ہے۔ سمندر کی حالت عمومی طور پر ہلکی سے درمیانی اور بارش کے دوران متلاطم رہے گی۔

خلیج عرب میں ہوائیں شمال مغرب سے جنوب مغرب کی سمت چلیں گی، جو شام کے وقت شمالی حصے میں جنوب سے جنوب مشرق اور درمیانی و جنوبی حصے میں جنوب مشرق سے شمال مشرق کی سمت بدل جائیں گی۔ ان کی رفتار 10 سے 32 کلومیٹر فی گھنٹہ رہے گی، جو جنوبی حصے میں گرج چمک کے ساتھ بارش کے دوران 50 کلومیٹر فی گھنٹہ سے زیادہ ہو سکتی ہے۔ موجوں کی اونچائی نصف میٹر سے ڈیڑھ میٹر تک اور بارش کے دوران دو میٹر سے بھی زیادہ ہو سکتی ہے۔ سمندر کی حالت ہلکی سے درمیانی اور بارش کے دوران متلاطم رہے گی۔