اساتذہ کیلئے 'مصافحہ طلائی' پروگرام فارس سسٹم میں شامل

وزارت تعلیم نے اساتذہ اور معلمات کیلئے 'مصافحہ طلائی' پروگرام کو فارس سسٹم میں بطور استعفیٰ کی وجہ شامل کر دیا ہے، جس سے وزارت کے ملازمین اپنے اکاؤنٹس کے ذریعے اس آپشن تک براہ راست رسائی حاصل کر سکتے ہیں۔

'مصافحہ طلائی' پروگرام کا مقصد کارکردگی میں بہتری، اخراجات میں کمی اور افرادی قوت کی تجدید ہے، جس کیلئے مالی مراعات بھی فراہم کی جاتی ہیں۔ اس پروگرام سے استفادہ کیلئے متعلقہ ادارے کی منظوری، تبادلے و اعارے کے ضوابط اور سروس کے سال مکمل کرنا ضروری ہے۔

اساتذہ فارس سسٹم میں لاگ ان کرنے کے بعد اس پروگرام کا انتخاب کر سکتے ہیں۔ سروس سیلف میں داخل ہو کر استعفیٰ کا آپشن منتخب کریں، پھر 'Reason Type' پر کلک کرنے سے 'مصافحہ طلائی' پروگرام استعفیٰ کی وجوہات میں ظاہر ہو جائے گا۔

یہ پروگرام سرکاری اداروں میں انتظامی اور آپریشنل کارکردگی بہتر بنانے، اخراجات کم کرنے اور افرادی قوت کی تجدید کے ساتھ ساتھ رضاکارانہ طور پر ملازمت چھوڑنے والے اہلکاروں کو مخصوص شرائط کے تحت مالی مراعات فراہم کرتا ہے۔

پروگرام کے ضوابط میں تبادلے، اعارے یا مہارت سازی کے تمام مواقع استعمال کرنے، عمر اور سروس کے سال کی حد، ادارے کی منظوری اور کم تعلیمی قابلیت والوں کو ترجیح دینا شامل ہے۔

استعفیٰ کے بعد متعلقہ اسامی ختم کر دی جائے گی، سوائے سپروائزری عہدوں کے، اور پروگرام سے فائدہ اٹھانے والے کو دوبارہ ملازمت نہیں دی جائے گی۔ اس کے علاوہ، جو ملازمین قبل از وقت ریٹائرمنٹ کے اہل ہیں وہ اس سے مستثنیٰ ہوں گے۔

پروگرام کے فیصلے میں پہلے تین سال کیلئے مجموعی لاگت 12 ارب 754 ملین سعودی ریال مقرر کی گئی ہے، جبکہ مالی سال 1446/1447ھ (2025ء) کیلئے 5.0597 ارب سعودی ریال مختص کیے گئے ہیں۔

'مصافحہ طلائی' پروگرام سرکاری اداروں کے ان ملازمین کیلئے متعارف کرایا گیا ہے جو سول سروس اسکیل پر ہیں، تاکہ استعفیٰ کے ذریعے ملازمت چھوڑنے کی حوصلہ افزائی کی جا سکے۔ اس کیلئے تین سال میں 12.7 ارب سعودی ریال مختص کیے گئے ہیں۔

فیصلے میں وزارت افرادی قوت و سماجی ترقی کے بجٹ میں اس پروگرام کیلئے الگ مد شامل کرنے اور ان اداروں میں بھی اسی نوعیت کے پروگرامز کی منظوری کا طریقہ کار وضع کرنے کی ہدایت کی گئی ہے جن کے ملازمین کیلئے مخصوص ضوابط موجود ہیں۔