یومِ وطنی اتحاد اور ترقی کی علامت ہے: وزیر داخلہ

وزیر داخلہ شہزادہ عبدالعزیز بن سعود بن نایف بن عبدالعزیز نے کہا ہے کہ سعودی یومِ وطنی وطن کے مضبوط اتحاد اور ہمہ جہت ترقی کی علامت ہے۔

وزیر داخلہ نے اس موقع پر خادم الحرمین الشریفین شاہ سلمان بن عبدالعزیز، ولی عہد و وزیراعظم شہزادہ محمد بن سلمان اور سعودی عوام کو یومِ وطنی کی مبارکباد پیش کی۔

وزیر داخلہ نے اپنے پیغام میں کہا کہ یومِ وطنی ایک عظیم موقع ہے جب اہل وطن فخر کے ساتھ اس تاریخی جدوجہد کو یاد کرتے ہیں جو بانی مملکت شاہ عبدالعزیز بن عبدالرحمن آل سعود نے اپنے وفادار ساتھیوں کے ساتھ مل کر کی، جس کے نتیجے میں ایک مضبوط ریاست کی بنیاد رکھی گئی، جس کی اساس قرآن و سنت، عدل و انصاف اور انسان کی سلامتی و خوشحالی ہے۔

وزیر داخلہ نے واضح کیا کہ مملکت، خادم الحرمین الشریفین اور ولی عہد کی قیادت میں، ہمہ جہت ترقی کے سفر کو جاری رکھے ہوئے ہے۔ ایک پُرامید وژن کے تحت انسانی سرمایہ کاری، جدت اور کامیابی کے نئے افق کھولے جا رہے ہیں، جس سے سعودی عرب کی علاقائی و عالمی حیثیت مزید مضبوط ہوئی ہے۔

وزیر داخلہ نے کہا کہ مملکت نے علاقائی تبدیلیوں اور چیلنجوں کے باوجود اپنی سلامتی، استحکام اور قومی اثاثوں کا تحفظ یقینی بنایا ہے، جس کا سہرا قیادت کی حکمت، جوانوں کی بہادری اور قوم کے اتحاد و شعور کو جاتا ہے۔

انہوں نے وطن کے محافظوں کی جرات و قربانیوں کو سراہتے ہوئے کہا کہ ان کی خدمات باعث فخر ہیں۔ انہوں نے کہا کہ یہ موقع وفاداری اور وابستگی کے جذبات کو تازہ کرتا ہے اور ہر فرد کی ذمہ داری ہے کہ وہ قومی ترقی کے سفر اور قیادت کی توقعات کی تکمیل میں اپنا کردار ادا کرے۔ آخر میں انہوں نے دعا کی کہ اللہ تعالیٰ قیادت کو سلامت رکھے، مملکت کو ہمیشہ امن، استحکام اور خوشحالی عطا فرمائے اور یہ موقع ہر سال مزید ترقی و سربلندی کے ساتھ لوٹے۔