ابہا میں ابتدائی انتباہی نظام فعال، شہریوں کو احتیاط کی ہدایت

سعودی عرب میں محکمہ شہری دفاع نے ابہا کے شہریوں کو ہدایت کی ہے کہ وہ ابتدائی انتباہی نظام کے ذریعے جاری ہونے والے الرٹ کے بعد حفاظتی اقدامات پر عمل کریں۔

محکمہ نے شہریوں پر زور دیا ہے کہ وہ پرسکون رہیں اور سرکاری ہدایات پر عمل کریں، عمارتوں کے اندر رہیں اور کسی محفوظ کمرے یا ایسی جگہ منتقل ہو جائیں جو کھڑکیوں سے دور ہو۔ خطرہ ختم ہونے تک گھر یا عمارت سے باہر نہ نکلیں۔

رہنمائی میں کہا گیا ہے کہ کھلی جگہوں اور شیشے کے قریب جانے سے گریز کریں، بالکونی یا چھت پر ہرگز نہ جائیں۔ جو لوگ عمارتوں سے باہر ہیں، وہ قریبی عمارت میں داخل ہو جائیں یا کسی مضبوط دیوار کے پیچھے پناہ لیں۔

محکمہ نے مزید تاکید کی ہے کہ ہجوم سے بچیں اور ہرگز ویڈیو یا تصاویر نہ بنائیں، خطرناک مقامات سے دور رہیں۔ اگر انتباہی پیغام ڈرائیونگ کے دوران ملے تو پلوں اور بلند عمارتوں سے دور سڑک کے کنارے گاڑی روک لیں۔

محکمہ نے کہا ہے کہ مکہ مکرمہ، مدینہ منورہ، ریاض اور مشرقی ریجن میں کسی بھی خطرے کی صورت میں ہنگامی نمبر 911 اور باقی علاقوں میں 998 پر رابطہ کریں۔

مزید کہا گیا ہے کہ متعلقہ اداروں کی جانب سے جاری ہونے والی ہدایات کو سرکاری ذرائع سے باقاعدگی سے فالو کریں اور ان پر عمل کریں۔